बाजुरामा कांग्रेसका गिरीको अग्रता

बाजुरा I प्रतिनिधिसभा सदस्य निर्वाचनको मतगणनामा बाजुरामा नेपाली काँग्रेसले अग्रता लिएको छ । 

जिल्ला समन्वय समिति बाजुरामा भइरहेको मतगणनामा नेपाली कांग्रेसका उम्मेदवार जनकराज गिरीले एक हजार ८६९ मत ल्याएर अग्रस्थानमा हुनुहुन्छ । 

उहाँलाई नेकपा (एमाले)का उम्मेदवार लालबहादुर थापाले पछ्याउनुभएको छ । थापाले एक हजार ११० मत प्राप्त गर्नुभएको छ । हिमाली गाउँपालिकाका तीन हजार ६१३ मतगणना गर्दा काँग्रेसले सुरुवाती देखि नै अग्रता लिएको हो । 

शुक्रबार बेलुकी ७ बजेबाट सुरु भएको मतगणना जारी रहेको मुख्य निर्वाचन अधिकृत सञ्जीव पोखरेलले जानकारी दिनुभयो । यहाँका ८७ हजार ८६१ मतदातामध्ये ४५ हजार ३९० जनाले मतदान गर्नुभएकाे थियो । एक मात्र निर्वाचन क्षेत्र रहेको बाजुरामा सात राजनीतिक दल र एक स्वतन्त्रसहित आठ जना उम्मेदवार हुनुहुन्छ ।