पर्साका चारै निर्वाचन क्षेत्रमा रास्वपा अग्रस्थानमा 

वीरगञ्ज। पर्साका चार वटै निर्वाचन क्षेत्रमा राष्ट्रिय स्वतन्त्र पार्टीका उम्मेदवारहरूले मतान्तर बढाउँदै लगेपछि रातको समयमा समेत मतगणनास्थलमा रास्वपाका कार्यकर्ताहरूले खुशियाली मनाउन थालेका छन् । 

पर्सामा प्राप्त पछिल्लो मतपरिणाम अनुसार क्षेत्र नम्बर १ मा १४ हजार २ सय ९६  मत गणना हुँदा रास्वपाका हरि पन्त –(बुद्धि प्रसाद पन्त) ले अग्रता बढाउँदै लैजानुभएको छ । 

पन्तले ५ हजार ९ सय १५ मत प्राप्त गर्दा एमालेका उम्मेदवार प्रदीप यादवले ३ हजार ३ सय २ मत पाउनु भएको छ भने नेपाली काँग्रेसका उम्मेदवार अनिल रुंगटाले २ हजार ९ सय ८७ मत प्राप्त गर्नुभएको छ । 

त्यसैगरी पर्साको क्षेत्र नम्बर २ को प्राप्त पछिल्लो घोषित मतपरिणाम अनुसार रास्वपाका उम्मेदवार शुशिल साह कानुले  मतान्तर बढाउँदै लैजानु भएको छ । 

प्राप्त पछिल्लो मतपरिणाम अनुसार १५ हजार ३ सय ४४ मत गणना हुँदा रास्वपाका उम्मेदवार कानुले ७ हजार ३ सय ३९ मत प्राप्त गर्नुभएको छ भने नेपाली काँग्रेसका अजय चौरसीयाले ३ हजार १ सय १ मत प्राप्त गरी कानुलाई पछ्याई रहनु भएको छ । त्यसैगरी नेकपा एमालेकी रिमा कुमारी यादवले २ हजार ७ सय ९२ मत प्राप्त गर्नुभएको छ भने राप्रपाकी बिना जैसवालले २ सय १६ मत प्राप्त गर्नुभएको छ । 

यसैगरी पर्साकै क्षेत्र नम्बर ३ मा रास्वपाका उम्मेदवार रामाकान्त चौरसियाले ६ हजार २८ मत  प्राप्त गरी अग्रता बढाउँदै जानु भएको छ । सो क्षेत्रबाट नेपाली काँग्रेसका सुरेन्द्र चौधरीले २ हजार ६ सय ४० मत र एमालेका रुपेश पाण्डेले २ हजार ५ सय १२ मत प्राप्त गर्नुभएको छ । 

यता पर्सा क्षेत्र नम्बर ४ मा प्राप्त पछिल्लो मत परिणाम अनुसार रास्वपाका टेक बहादुर शाक्यले ३ हजार ९ सय २ मत प्राप्त गरी अग्रस्थानमा हुनुहुन्छ भने नेपाली काँग्रेसका रमेश रिजालले २ हजार २ सय २२ मत र नेकपा एमालेका जालिम मियाँले ८ सय ४७ मत प्राप्त गर्नुभएको छ ।