प्रतिनिधिसभा निर्वाचन: कास्की–२मा त्रिपक्षीय भिडन्त हुँदै

गण्डकी। कास्की क्षेत्र न-२ मा १७ जना उम्मेदवार चुनावी मैदानमा छन् । नेपाल कम्युनिस्ट पार्टी एमालेको प्रभाव रहेको यो  क्षेत्रलाई धेरैले उत्सुकताका साथ हेरेका छन् । 

अघिल्लो निर्वाचनमा एमालेकी नेत्री विद्या भट्टराई विजयी हुनुभएको थियो भने सोही पार्टीका रवीन्द्र अधिकारी २०६४ र २०७० को संविधानसभा निर्वाचन र २०७४ को निर्वाचनमा विजयी हुनुभएको थियो ।

अघिल्लो निर्वाचनमा काँग्रेस, माओवादी, एकीकृत समाजवादीसहितको गठबन्धनमा एमालेकी नेत्री भट्टराई विजयी हुनुभएको थियो । राष्ट्रिय स्वतन्त्र पार्टीका माधव कँडेल र नेपाली काँग्रेसका श्रीनाथ बराल क्रमशः दोस्रा र  तेस्रा भएका थिए । यहाँ त्रिपक्षी भिडन्त हुने अनुमान गरिएको छ । 

राष्ट्रिय स्वतन्त्र पार्टीले यस पटक नेकपा एमालेलाई पाखा लगाउने दाबी गरेको छ भने नेपाली काँग्रेसले अघिल्लो निर्वाचनमा गठबन्धनको कारण आफ्नै चुनाव चिह्न प्रयोग गर्न नपाएको गुनासो गरेको छ । यद्यपि उसले यस पटक आफ्नै चुनाव चिह्नमा मत माग्न  पाएकाले प्रतिद्वन्द्वीहरूलाई कडा टक्कर दिन सहज भएको बताएको छ । यहाँका मतदाता विभाजित छन् । अधिकांशले एमाले, काँग्रेस र राप्रपाबीच नै प्रतिस्पर्धा हुने बताएका छन् । 

यहाँ नेकपा एमालेका रश्मि आचार्य, नेपाली काँग्रेसका माधव बास्तोला, नेकपा (एकीकृत)का हेमबहादुर थापा, राष्ट्रिय स्वतन्त्र पार्टीका उत्तमप्रसाद पौडेल, उज्यालो नेपाल पार्टीबाट कुशल गुरुङ, राष्ट्रिय प्रजातन्त्र पार्टीका हेमजङ गुरुङसहित १७ जना मैदानमा हुनुहुन्छ ।

गाउँ बस्तीमा भोट माग्न गएका उम्मेदवारले नयाँ पुस्ताका उठाएका भ्रष्टाचारमुक्त प्रशासन, रोजगारी सिर्जना, गुणस्तरीय शिक्षा र देशको समृद्धिलाई प्राथमिकतामा राखेको बताएका छन् । 

मतदाताले भरतपोखरीका चवादी, कुर्लिङ, सिङगारेवासलगायत गाउँ–बस्तीमा आधारभूत आवश्यकताका पूर्वाधार निर्माण  गर्न उम्मेदवारसमक्ष आग्रह गरेका छन् ।रासस