डडेल्धुरामा त्रिपक्षीय प्रतिस्पर्धा, उम्मेदवारहरू घरदैलौमै व्यस्त

डडेल्धुरा। प्रतिनिधिसभा निर्वाचन आउन अव १२ दिन मात्र बाँकी छ। २१ फागुनमा हुने निर्वाचनका लागि दल तथा स्वतन्त्र उम्मेदवारहरू चुनावी आमसभा भन्दा पनि घरदैलो र भेटघाटमै व्यस्त छन् ।

 यसैबिच डडेल्धुरामा नेपाली काँग्रेस, राष्ट्रिय स्वतन्त्र पार्टी (रास्वपा) र नेपाली कम्युनिस्ट पार्टी (नेकपा) बिच कडा प्रतिस्पर्धा हुने आङ्कलन गरिएको छ । २०४८ यताका सबै प्रतिनिधि सभा चुनाव जितेको काँग्रेसले जिल्लाका सबैभन्दा बढी अर्थात् ६ हजार क्रियाशील सदस्य रहेकोमा पहिलो हुने दाबी गरेको छ  । काँग्रेसबाट अहिले पार्टीका पूर्व सदस्य नैन सिंह महर चुनाव लडिरहनु भएको छ ।

रास्वपाले पनि देशभरको जनलहरलाई आधार मनाउँदै यस पूर्व २०७९को प्रदेश सभा “ख ”बाट निर्वाचन जितेका डा. ताराप्रसाद जोशी अहिले रास्वपाका उम्मेदवार रहेकोमा जित्ने दाबी रास्वपाको छ । 

२०६४ को पहिलो संविधानसभा निर्वाचन पछि लगातार काँग्रेस पछिको दोस्रो पार्टीका रूपमा रहेका पूर्व माओवादीको दाबी यस पटक नेकपामा समायोजन हुँदा र अहिले पूर्व प्रधानमन्त्री शेरबहादुर देउवा नहुँदा चुनाव जित्ने दाबी गरेको छ। पूर्व माओवादी समेत रहेका नेकपाबाट मानसिंह माल अहिले चुनाव लडिरहनु भएको छ ।

 जिल्लामा भने एमालेमा सङ्गठित सदस्य सङ्ख्या न्यून रहेको तथा पछिल्ला निर्वाचनमा कुनै पनि स्थानीय तह र प्रदेशमा प्रमुख पदमा नजितेकोले त्रिपक्षीय भिडन्त हुने आङ्कलन धेरैको छ ।

पार्टीले भने पूर्व राष्ट्रियसभा सदस्य भएका चक्रप्रसाद स्नेहीलाई अघि सारेकोमा प्रतिस्पर्धामा आउने एमालेको दाबी छ । 

डडेल्धुरामा अहिलेको निर्वाचनमा काँग्रेसका महर, नेकपाका  माल, र एमालेका स्नेही प्रदेशसभा “क” का स्थानीय हुन भने अर्का प्रतिस्पर्धी रास्वपाका जोशी प्रदेश सभा “ख” का स्थानीय हुन । यद्यपि केही मतहरू भौगोलिक रूपमा विभाजन हुन्छनकि भन्ने आशङ्का पनि छ । 

यदि प्रदेशसभा “क” मा स्थानीयको हिसाबमा मत विभाजन भएमा प्रदेशसभा “ख” लेनै निर्णायक मत प्रदान गर्न सक्ने आङ्कलन धेरैको छ । 

एउटा मात्र प्रतिनिधिसभा क्षेत्र रहेको डडेलधुरामा तीन स्वतन्त्र र दलका तर्फबाट १० गरी १३ उम्मेदवार चुनावी प्रतिस्पर्धामा छन् । १०४ मतदानस्थल र १४१ मतदान केन्द्रबाट ९३ हजार ४०३ मतदाताहरूले मतदान गर्ने छन् ।