खुल्ला राष्ट्रिय मोहन मेमोरियल अन्तर विद्यालय ब्याडमिन्टन प्रतियोगिता सुरु

पोखरा । पर्यटनको राजधानी पोखरामा आज (शुक्रबार) देखि पाँचौँ संस्करणको खुल्ला राष्ट्रिय मोहन मेमोरियल अन्तर विद्यालय स्तरीय ब्याडमिन्टन प्रतियोगिता–२०८२ सुरु भएको छ । मोहन भूगोल ब्याडमिन्टन फाउन्डेसन र फिट नेपाल स्पोट्र्सप्लेक्सको आयोजनामा पोखरा १०, हस्पिटल चोकस्थित फिट नेपाल स्पोट्र्सप्लेक्समा फागुन ३ गतेसम्म सञ्चालन हुने प्रतियोगिताको उद्घाटन जापानी प्रशिक्षक टिस्यु–यामामोतोले गर्नुभयो ।

उहाँले नेपालको ब्याडमिन्टन खेलको विकासको लागि फिट नेपालकै अवधारणामा तल्लो स्तरको विभिन्न प्रशिक्षण सहितको प्रतियोगितासहित यस खेलमा लगानी गर्नुपर्नेमा जोड दिनुभयो । मुख्य चार वटा इभेन्टमा छात्र तथा छात्रा तर्फको प्रतिस्पर्धा आज(शुक्रबार) देखि पोखरामा सुरु भएको फाउन्डेसनका अध्यक्ष भूगोल गुरुङले बताउनुभयो । प्रतियोगितामा यू–११, यु–१३, यू–१७, र यू–१९ छात्र तथा छात्रा उमेर समूहका करिब २ सय भन्दा बढी खेलाडीहरूको प्रतिस्पर्धा गर्ने उहाँले जनाउनुभयो ।

ब्याडमिन्टन खेलमार्फत विद्यालय तहदेखि राष्ट्रिय तथा अन्तर्राष्ट्रिय स्तरसम्मका उदयमान खेलाडीहरूको प्रतिभा पहिचान गर्ने, खेलकुद विकासलाई टेवा दिने तथा प्रतिस्पर्धात्मक वातावरण सिर्जना गर्ने उद्देश्य सहित प्रतियोगिता निरन्तर रुपमा आयोजना गरिएको उहाँले बताउनुभयो ।

प्रतियोगिता अन्तर्गत यू—११ र यू—१३ तर्फका विजेता खेलाडीहरूलाई मेडल, प्रमाणपत्र तथा गिफ्ट ह्याम्पर प्रदान गरिनेछ । त्यसैगरी यू–१७ तथा यू–१९ समूहमा प्रथम हुने खेलाडीले जनही मेडल, ट्रफी, प्रमाणपत्रसहित नगद ४० हजार रुपैयाँ, द्वितीयले २० हजार र तृतीयले १५ हजार रुपैयाँ पुरस्कार प्राप्त गर्नेछन् । साथै समग्र पदक तालिकाका आधारमा उत्कृष्ट प्रदर्शन गर्ने विद्यालयलाई ‘बेस्ट स्कुल ट्रफी’ प्रदान गरिने आयोजकले जनाएको छ ।

फिट नेपाल र मोहन भूगोल ब्याडमिन्टन फाउन्डेसनको मुख्य नारा “रोड टु ओलम्पिक” रहेको छ । प्रतियोगिताले विद्यालय स्तरका खेलाडीलाई राष्ट्रिय तथा अन्तर्राष्ट्रिय स्तरतर्फ अघि बढ्न प्रेरणा मिल्ने संयोजक बरदान ताङवे लामाले विश्वास व्यक्त गर्नुभयो । प्रतियोगितामा अन्डर–१५ राष्ट्रिय च्याम्पियन निभा राई, अन्डर–१७ राष्ट्रिय च्याम्पियन दिलासा राना लगायतका चर्चित खेलाडीहरूको सहभागिता रहेको छ । प्रतियोगिताको उद्घाटनको अवसरमा पारा ओलम्पियन प्रकाश अधिकारी र अन्तर्राष्ट्रिय खेलाडी विवेक सुवेदी बिच मैत्रीपूर्ण खेल भएको शोभा केसीले बताउनुभयो ।