बाँकेमा ६१ मतदान स्थल अति संवेदनशील

नेपालगञ्ज। बाँकेमा ६१ वटा मतदान स्थललाई अति संवेदनशील मानिएको छ।

कुल १३९ मतदान स्थलमध्ये ५० वटा संवेदनशील तथा २८ वटालाई सामान्य मतदान स्थल तोकिएको छ । जिल्ला सुरक्षा समितिले यसैलाई मुख्य आधार बनाएर निर्वाचनलक्षित विशेष सुरक्षा रणनीति तयार पारेको छ । 

बाँकेका प्रमुख जिल्ला अधिकारी दिल कुमार तामाङले भौगोलिक अवस्था, खुला सिमाना र अन्य विभिन्न कारणले सुरक्षा संवेदनशीलतालाई ध्यानमा राखी मतदान स्थललाई संवेदनशील र अति संवेदनशीलमा विभाजन गरिएको बताउनुभयो । 

जिल्लामा ४०० मतदान केन्द्र कायम गरिएको छ । जिल्ला प्रहरी कार्यालय बाँकेका प्रमुख प्रहरी उपरीक्षक अंगु जिसीले निर्वाचनलाई मर्यादित र भयरहित तरिकाले सम्पन्न गर्नका लागि कडा सुरक्षा व्यवस्था गरिने बताउनुभयो ।

जिल्ला निर्वाचन अधिकारी टेक बहादुर शाहीका अनुसार बाँकेको निर्वाचन क्षेत्र नम्बर १ मा कोहलपुर नगरपालिका, राप्तीसोनारी गाउँपालिका तथा नरैनापुर गाउँपालिका अन्तर्गत सबै ३० वडा समावेश छन् । यस क्षेत्रमा कूल १ लाख २४ हजार ७२७ मतदाता रहेका छन् । निर्वाचन क्षेत्र नम्बर–१ मा ४८ वटा मतदान स्थलसहित १४१ मतदान केन्द्र निर्धारण गरिएको छ ।

नेपालगञ्ज उपमहानगरपालिकाका २१ र डुडुवा गाउँपालिकाका सबै ६ गरी २७ वडा रहेका क्षेत्र नम्बर २ मा ५७ हजार ११७ जना पुरुष, ५१ हजार १६७ जना महिला र ६ जना अन्यसहित कूल १ लाख आठ हजार २९० मतदाता रहेका छन् । मतदान प्रक्रियालाई सहज र व्यवस्थित तुल्याउन ४३ वटा मतदानस्थलसहित १२४ वटा मतदान केन्द्रको व्यवस्था गरिएको छ ।

यसैगरी नेपालगञ्ज उपमहानगरपालिकाका १६ र १७ वडा, जानकी गाउँपालिकाका सबै ६, खजुरा गाउँपालिका सबै ८ र बैजनाथ गाउँपालिकाका सबै ८ गरी २४ वडा समेटिएको निर्वाचन क्षेत्र नम्बर–३ मा ५८ हजार ६६४ जना पुरुष र ५८ हजार ६८९ जना महिला गरी कूल १ लाख १७ हजार ३५४ मतदाता रहेको जिल्ला निर्वाचन अधिकारी शाहीले जानकारी दिनुभयो । बाँकेमा तीन निर्वाचन क्षेत्रमा ५६ जना उम्मेदवार छन् ।