ट्रक र स्कुटर एक आपसमा ठोक्किँदा इलाममा दुई जनाको मृत्यु

इलाम  । इलाममा आज भएको सवारी दुर्घटनामा परी दुई जनाको मृत्यु भएको छ ।

मेची राजमार्गको इलाम नगरपालिका–९ भञ्ज्याङ गोलाईमा झापाबाट इलामतर्फ आउँदै गरेको ट्रक र विपरीत दिशातर्फ गरेको स्कुटर  आज करिब ३ः०० बजे दुर्घटना हुँदा इलाम नगरपालिका –९ गोलबस्ती बस्ने  २६ वर्षका  डेबिट थापा मगर र माईजोगमाई गाउँपालिका–१ नयाँ बजार घर भई इलाम बजार बस्ने १८ वर्षका छेवाङ शेर्पाको मृत्यु भएको जिल्ला प्रहरी कार्यालय इलामका सूचना अधिकारी डिएसपी लक्ष्मी भण्डारीले जानकारी दिनुभयो ।

१–०१–००१ ख ४१०१ न.को ट्रक र प्रदेश १–०१–०१२ प ४८९९ नं.को स्कुटर दुर्घटना हुँदा स्कुटरमा सवार मगरको पेटमा गम्भीर चोट र शेर्पाको टाउको र खुट्टामा गम्भीर चोट लागि दुवै जना गम्भीर घाइते भई उपचारको लागि जिल्ला अस्पताल इलाममा ल्याएकोमा उनीहरूको उपचारको क्रममा डाक्टरले दुवै जना घाइतेलाई मृत घोषणा गरेका थिए ।

ट्रक चालक इलाम नगरपालिका ५  बिब्ल्याटे बस्ने  २५ वर्षका राम प्रसाद श्रेष्ठ जिल्ला प्रहरी कार्यालय इलामको नियन्त्रणमा रहेका छन् ।