अस्वस्थ जीवनशैलीका कारण बाँकेका पत्रकार मुटु रोगको जोखिममा

नेपालगन्ज ।अस्वस्थ जीवनशैलीका कारण बाँकेका पत्रकारहरू मुटु रोगको जोखिममा परेका छन् । नेपाल पत्रकार महासङ्घ बाँकेको आयोजना, नेपाल प्रेस युनियन बाँके र स्वर्गीय पन्नालाल गुप्ता प्रतिष्ठानको समन्वय तथा भेरी अस्पतालको प्राविधिक सहयोगमा पत्रकारहरूलाई लक्षित गरी आयोजना गरिएको निःशुल्क ‘मुटु जाँच शिविर’ मा उनीहरूको स्वास्थ्य परीक्षण गर्दा रिपोर्टमा मुटु रोगको जोखिम देखिएको हो ।

७७ जना पत्रकारहरूको चेकजाँच गर्दा ४५ प्रतिशत बढीलाई कोलेस्ट्रोलको समस्या देखिएको भेरी अस्पतालका मुटु रोग विभाग प्रमुख समेत रहनुभएका प्रमुख कन्सल्टेन्ट कार्डियोलोजिष्ट डा.कृष्ण अधिकारीले बताउनुभयो । उहाँका अनुसार उच्च रक्तचाप र सुगरको समस्या पनि धेरैमा देखिएको छ ।

‘अस्वस्थ जीवनशैली र खानपानका कारण मुटुलाई असर गर्ने रोग धेरैमा देखिएको पाइयो’ डा.अधिकारीले भन्नुभयो–‘उहाँहरूलाई अनुशासित जीवनशैली अङ्गीकार गर्न र जीवनशैली बदल्न सुझाव दिएका छौँ ।’ वरिष्ठ कन्सल्टेन्ट कार्डियोलोजिष्ट डा। विकास नेपालका अनुसार शरीरमा कोलेस्ट्रोलको मात्रा धेरै भएमा मुटु सम्बन्धि समस्या हुने गर्छ । शरीरमा अतिरिक्त कोलेस्ट्रोल जम्मा भएमा वा रगतमा कोलेस्ट्रोलको मात्रा उच्च भएमा यसले रक्त धमनीमा अवरोध पैदा गरी मुटु सम्बन्धि गम्भीर समस्या निम्त्याउने गर्छ । यसबाट हृदयाघातको सम्भावना समेत बढ्ने गर्छ । त्यसैले यसको नियन्त्रणका लागि व्यक्ति सचेत हुनुपर्ने डा. नेपालको भनाई छ ।

कोलेस्ट्रोललाई नियन्त्रण गर्नका लागि व्यायाम गर्ने, धूम्रपान तथा मद्यपान त्याग्नुका साथै बोसोरहित खानेकुराको सेवन गर्न डा. अधिकारी सुझाउनुहुन्छ । डा. अधिकारीले फाइबरयुक्त खानेकुराका साथमा हरिया सागसब्जी, फलफूल तथा तरकारीको सेवन अधिक मात्रामा गर्न सुझाव दिनुभएको छ । मुटु रोग विभागमै कार्यरत फिजिसियन डा।विपिन आचार्यले पत्रकारहरूको स्वास्थ्य रिपोर्टमा मुटुमै समस्या भएको नपाइए पनि तर जोखिम निम्त्याउने कारणहरू धेरैमा देखिएको भन्दै जीवनशैली फेर्न सुझाव दिनुभएको छ । उमेर, शरीर अनुसारको तौल सन्तुलनमा राख्नेदेखि नियमित व्याम गर्ने, खानपिनमा सचेतता अपनाउन उहाँको सुझाव छ ।

प्रेस स्वतन्त्रता सेनानी स्वः पन्नालाल गुप्ताको ९७औँ जन्मजयन्तीको अवसरमा आयोजित उक्त शिविरको उद्घाटन नेपाल पत्रकार महासङ्घ लुम्बिनी प्रदेशका अध्यक्ष शुक्रऋषि चौलागाईले गर्नुभएको थियो । त्यसक्रममा उहाँले पत्रकारहरू आफ्नो स्वास्थ्यबारे सचेत हुनुपर्छ भन्ने सन्देश शिविरले दिएको बताउनुभयो ।

भेरी अस्पतालका प्रमुख मेडिकल सुपरिन्टेन्डेन्ट डा।निराजन सुवेदीले हरेक नागरिकको मुटु बलियो हुनुपर्ने भन्दै पत्रकारहरूको मुटु झनै बलियो हुनुपर्ने धारणा राख्नुभयो । उहाँले त्यसका लागि नियमित चेकजाँच गर्न र स्वस्थ जीवनशैली अपनाउन सुझाव दिनुभयो । 

नेपाल पत्रकार महासङ्घ बाँकेका अध्यक्ष नवीन गिरीले मुटु स्वस्थ र मन स्वच्छ राखेर असल पत्रकारिता गरौँ भन्ने सन्देशका लागि शिविर महत्वपूर्ण भएको बताउनुभयो । उहाँले पत्रकारले आम मानिसमा नियमित मुटु जँचाउन र जोगाउन सन्देश प्रवाह गर्नुपर्नेमा पनि जोड दिनुभयो ।

नेपाल प्रेस युनियन बाँकेका अध्यक्ष प्रिया स्मृति ढकालले नसर्ने रोगको प्रभाव न्यूनीकरणका लागि सचेतना फैलाउन शिविरले आम पत्रकारहरूको ऐक्यबद्धता छ भन्ने सन्देश दिएको बताउनुभयो । यस्तै प्रतिष्ठानका अध्यक्ष तथा प्रेस स्वतन्त्रता सेनानी गुप्ताका छोरा विजय गुप्ताले शिविर आयोजनाले आफ्ना पिताप्रति उच्च सम्मान गरेको भन्दै धन्यवाद दिनुभयो । कार्यक्रमको सहजीकरण पत्रकार महासङ्घ बाँकेका सचिव कृष्ण ओलीले गर्नुभएको थियो ।