पोखरामा राष्ट्रिय घर निर्माण महोत्सव सुरु 

पोखरा । पोखरामा पहिलो पटक राष्ट्रिय घर निर्माण महोत्सव(फेस्ट) २०८२ सुरु भएको छ । 

स्किल सेवा पोखराको आयोजनामा अमरसिंह चौरमा सुरु भएको उक्त महोत्सवको पोखराका मेयर धनराज आचार्यले उद्घाटन गर्दै पोखरामा अधिकांश घरहरू मानव बस्तीका हिसाबले र वातावरणीय दृष्टिले उपयुक्त नभएको बताउनुभयो । 

पोखराका करिब ८० प्रतिशत घरमा समस्या रहेको बताउँदै उहाँले अब पोखरामा निर्माण हुने घर हावाको आवतजावत देखि वातावरणमैत्री हुनुपर्ने जनाउनुभयो । 

महानगरले विल्डिङ कोर्ड जारी रहेकोले यसको फलो गर्न मेयर आचार्यले सुझाव दिनुभयो । जमिन बजेटको आधारमा घर बनाउन सकिने जनाउँदै मेयर आचार्यले एक सय भन्दा बढी कन्सल्टेन्टहरू पोखरामा रहेको बताउनुभयो । 

घर निर्माणसँग सम्बन्धित सबै सेवा र जानकारी एउटै छत मुनि उपलब्ध गराउने अवसरको रूपमा पोखरामा उक्त महोत्सव आयोजना गरिएको स्किल सेवा पोखराका समन कुँवरले बताउनुभयो । 

लगानी जुटाउने र साझेदारीका अवसरहरू समेत उजागर हुने भएकाले यस महोत्सवले समग्र आवास निर्माण क्षेत्रमा सकारात्मक परिवर्तन ल्याउने संस्थाका सञ्चालक सताक्षी मिश्राले जनाउनुभयो । 

दुई दिन चल्ने फेष्टमा करिब पाँच हजार भन्दा बढी सहभागी हुने अपेक्षा गरिएको छ । फेष्टमा ३२ वटा स्टलहरू रहेका छन् । पोखरामा पहिलो पटक भएको उक्त कार्यक्रमबाट धेरै पोखरेलीहरू लाभान्वित हुने मार्केटिङ म्यानेजर सफल प्रधानले विश्वास व्यक्त गर्नुभयो ।