स्वास्थ्य मन्त्री पौडेलद्वारा हैजा प्रभावित बिरामीको उपचार सम्बन्धी जानकारी

वीरगन्ज । वीरगन्जमा हैजाको प्रकोप समुदाय स्तरमै फैलिँदै गएपछि स्वास्थ्य तथा जनसङ्ख्या मन्त्री प्रदीप पौडेलले आज अपराह्न वीरगन्जको नारायणी अस्पतालको स्थलगत अनुगमन तथा निरीक्षण गर्नुभएको छ । 

निरीक्षणका क्रममा मन्त्री पौडेलले अस्पतालमा उपचाररत बिरामीहरूको स्वास्थ्य अवस्था, औषधि आपूर्ति, सेवा प्रवाह, तथा उपचारमा देखिएका चुनौतीहरूको प्रत्यक्ष जानकारी लिनुभएको थियो । 

मन्त्री पौडेल बिरामीहरूको शय्यामा पुगेर स्वास्थ्य अवस्था बुझ्नुका साथै औषधि वितरणको अवस्थाबारे चासो व्यक्त गर्नुभएको थियो । सो अवसरमा केही बिरामीका आफन्तले डाक्टरले तोकेको औषधि आफैँले किन्नुपरेको गुनासो राख्दा मन्त्री पौडेलले तत्काल सम्बन्धित पक्षलाई जानकारी गराई बिरामीका आफन्तलाई औषधी किन्न लगाउनेलाई कारबाही गरी निःशुल्क रूपमा औषधी उपलब्ध गराउन  निर्देशन दिनुभएको थियो । 

स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार आज दिउसो सम्म वीरगन्जमा हैजा सङ्क्रमितको सङ्ख्या ७९ पुगेको छ । 

नारायणी अस्पतालको स्थलगत अनुगमनपछि मन्त्री पौडेलले आजै वीरगन्ज महानगरपालिकाका प्रमुख राजेशमान सिंह, स्वास्थ्य कार्यालयका अधिकारीहरू र अन्य सरोकारवालासँग हैजा नियन्त्रणका लागि भइरहेका प्रयासहरूबारे समीक्षा तथा समन्वयात्मक छलफल समेत गर्नुभएको छ । 

हाल हैजा नियन्त्रणका लागि स्थानीयदेखि सङ्घीय तहसम्मको समन्वयमा प्रभावित क्षेत्रमा पिउने पानीको शुद्धीकरण, घरदैलो जनचेतना कार्यक्रम, र उपचार सेवाको सुदृढीकरण जस्ता कार्यक्रम सञ्चालन गरिएको छ ।