सल्यानमा डोजर दुर्घटना हुँदा २ जना घाइते 

सल्यान । सल्यानको छत्रेश्वरी गाउँपालिकामा डोजर दुर्घटना हुँदा दुई जना घाइते भएका छन् । बुधवार साँझ छत्रेश्वरी गाउँपालिकाको बा १ ग ३५४० नम्बरको डोजर छत्रेश्वरी गाउँपालिका १ फारुलीबोट नजिकै दुर्घटना भएको हो । 

दुर्घटनामा परी डोजर अपरेटर चित्र बहादुर खत्री र एक्स्काभेटर अपरेटर हिमलाल विक घाइते भएको छत्रेश्वरी गाउँपालिका १ का वडाध्यक्ष प्रकाश हमालले जानकारी दिनु भयो । छत्रेश्वरी गाउँपालिका १ को दमाचौर र वडा न २ को बुराँसे जोड्ने सडक निर्माणको क्रममा दमाचौर तर्फ तेल लिन आउने क्रममा ब्रेक भएर डोजर दुर्घटना भएको हमालको भनाई छ । 

डोजर सडकबाट करिब ५० मिटर तल खसेको छ । घाइते दुवैको टाउकोमा चोट देखिएको छ । घाइते दुवै जनाको दमाचौरमा प्राथमिक उपचार पश्चात् थप उपचारका लागि श्रीनगर पठाइएको हमालले बताउनुभयो ।