गभर्नर पौडेलको सम्पत्ति विवरण : सात कम्पनीमा शेयर लगानी, ललितपुर र नवलपरासीमा घरजग्गा

काठमाडौँ । नेपाल राष्ट्र बैंकले नवनियुक्त गभर्नर डा विश्वनाथ पौडेलको सम्पत्ति विवरण सार्वजनिक गरेको छ । 

गभर्नर पौडेलले यही असार ५ गते राष्ट्र बैङ्कमा पेस गरेको सम्पत्ति विवरणअनुसार विभिन्न सातवटा कम्पनीमा शेयर लगानी तथा ललितपुर र नवलपरासीमा घरजग्गा रहेको छ । 

प्रतिभा शर्माको नाममा ललितपुरको सैंबुस्थित कित्ता नम्बर ६४३ को पाँच आना दुई दाम जग्गा र त्यसमा बनेको दुई हजार ७९५ वर्गफिट घरलाई गभर्नर पौडेलको सम्पत्ति विवरणमा देखाइएको छ । यो जग्गा पैतृक सम्पत्ति तथा स्वआर्जन रकमबाट रु एक करोड ५५ लाखमा खरिद गरिएको विवरणमा उल्लेख छ । 

त्यस्तै, शर्माकै नाममा नवलपरासी गैँडाकोटमा कित्ता नम्बर ४१७४ को जग्गा र त्यसमा बनेको घरलाई पनि सम्पत्तिका रूपमा देखाइएको छ । यो जग्गा पैतृक सम्पत्ति तथा स्वआर्जनबाट रू ६० लाखमा किनेको उल्लेख छ ।

पैतृक सम्पत्तिका रूपमा करिब ४५ तोला सुन र स्वआर्जनबाट किनेको रू १५ लाख बराबरको हीराका गहनालाई पनि गभर्नर पौडेलको सम्पत्तिका रूपमा देखाइएको छ । 

विश्वनाथ पौडेलका नाममा सानिमा बैङ्कमा रू १३ लाख २३ हजार १९२, नेपाल इन्भेष्टमेन्ट मेगा बैङ्कमा रू दुई लाख ५९ हजार ३४४ र सानिमा बैङ्कमा अमेरिकी डलर ६६ दशमलव ७८ बराबर मौज्दात रहेको छ । 

त्यस्तै, प्रतिभा शर्माको नाममा सानिमा बैङ्कमा रू १२ हजार ५४७, प्रभु बैङ्क लिमिटेडमा रू चार लाख ७३ हजार ८२२ र सानिमा बैङ्कमा अमेरिकी डलर चार हजार ४४६ रहेको उल्लेख छ । 

विश्वनाथ पौडेलका नाममा विभिन्न कम्पनीको प्रवद्र्धक तथा साधारण शेयर रहेको सम्पत्ति विवरणमा उल्लेख छ । जसमा सानिमा बैङ्कको दुई लाख ४४ हजार १७६ कित्ता, सानिमा मिडल तमोर हाइड्रोपावरको एक लाख ८८ हजार कित्ता, ग्लोबेको प्रालिको एक लाख ८६ हजार ८३४ कित्ता, संयुक्त ऊर्जा हाइड्रोपावरको पाँच लाख कित्ता र चितवन इनर्जी लिमिटेडको दुई लाख ५० हजार कित्ता प्रवद्र्धन शेयर रहेको छ । 

त्यस्तै, पौडेलको नाममा सानिमा माइ हाइड्रोपावरको ९२ हजार ५७९ कित्ता साधारण शेयर रहेको पनि विवरणमा देखाइएको छ । प्रतिभा शर्माको नाममा रहेको ग्लोबेको प्रालिको ७५ हजार कित्ता प्रवद्र्धक शेयरलाई पनि गभर्नर पौडेलको सम्पत्ति विवरणमा देखाइएको छ । 

त्यस्तै, शर्माको नाममा २०७७ भदौमा रू ४४ लाखमा खरिद गरिएको सुजुकी कारलाई पनि गभर्नर पौडेलको सम्पत्ति विवरणमा खुलाइएको छ । अधिकांश सम्पत्तिको स्रोतका रूपमा स्वआर्जन र पैतृक सम्पत्ति देखाइएको छ ।