नियमित शुद्ध पानी उपलब्ध गराउन सरकार प्रतिबद्ध : मन्त्री यादव

विराटनगर । खानेपानी मन्त्री प्रदीपकुमार यादवले,आम नागरिकलाई नियमित रुपमा शुद्ध तथा गुणस्तरीय खानेपानी उपलब्ध गराउन सरकार प्रतिबद्ध रहको बताउनुभएको छ ।

 विराटनगर–१४ स्थित जतुवा  खानेपानी सरसफाई आयोजना हस्तान्तरण कार्यक्रमलाई आज संवोधन गर्नुहुँदै  उहाँले नेपाल  सरकारले यसै वर्ष भित्र ५७  प्रतिशत नागरिकमा शुद्ध तथा १ सय प्रतिशत नागरिकमा आधारभूत खानेपानी पुर्‍याउने लक्ष्य  अनुसार  काम  गरिरहेको बताउनुभयो ।

  मुलुक सङ्घीय  संरचनामा गए अनुसार नेपाल सरकारले एक घर  एक धारा जडान अभियान शुरु गरेको बताउँदै बजेट र पैसाको अभावमा अव कुनै पनि योजना नरोकिने बताउनुभयो  ।  अहिले पनि नागरिकलाई खानेपानी उपलब्ध  गराउने  कतिपय स्थानीय  तहले  चापाकल जडान गदै आएको  त्यस्तो चापाकल वाट प्रयोग हुने पानीमा आर्र्सनिकको मात्रा देखिएको र त्यो स्वास्थ्यका लागि गम्भीर हानिकारक भएकाले   नागरिकलाई  स्वच्छ खानेपानी उपलब्ध गराउन डिप टुवेल जडान गर्नुपर्नेमा उहाँले जोड दिनुभयो ।

 मन्त्री यादवले कोशी प्रदेशमा निर्माणाधीन अवस्थामा रहेको तथा निर्माण भएका खानेपानीको ओभर हेड टङ्की प्रयोग विहीन अवस्थामा रहेकाले आगामी एकवर्ष भित्र त्यस्ता सबै ओभर हेड टङ्की  सञ्चालनमा ल्याउने जानकारी  दिनुभयो । 

कार्यक्रममा  कोशी प्रदेशका खानेपानी , सिचाई तथा उर्जामन्त्री एकराज कार्कीले, आवश्यकता भन्दा पनि पहुँचको आधारमा  विकास निमार्णका योजनाहरू बन्ने गरेकाले त्यस्ता विकास निमार्णका योजनाहरू प्रभावकारी नहुने र त्यसले पूर्णता नपाउने बताउनुभयो ।

 कोशी प्रदेश प्रदेशसभा सदस्य अमृत अर्याल तथा गितारानी महत्तले अधुरा रहेको खानेपानी योजनाहरू चाडै सम्पन्न गर्नुपर्नेमा जोड दिनुभयो । कोशी प्रदेशका पुर्वमन्त्री जयराम यादवले, हस्तान्तरणमा आएको  जतुवामा खानेपानी योजनालाई पूर्ण रुपमा सञ्चालन गर्नुपर्नेमा जोड दिनुभयो । कार्यक्रम जतुवा खानेपानी आयोजना उपभोक्ता समूहका अध्यक्ष विरेन्द्र यादवले खानेपानी आयोजना सञ्चालनमा जोड दिनुभयो । उक्त अवसरमा  सो आयोजना  एक कार्यक्रमका बिच नेपाल खानेपानी संस्थानलाई हस्तान्तरण गरिएको छ । स्थानीय उपभोक्ता समूहद्वारा २०६५  सालमा निमार्ण शुरु भएको  सो खानेपानी आयोजना अहिले सम्म पनि पूर्ण रुपमा सञ्चालनमा आउन नसकेपछि नेपाल खानेपानी  संस्थानलाई हस्तान्तरण गरिएको हो । अबको एकवर्ष भित्र सो आयोजना पूर्ण रुपमा सञ्चालनमा आउने सो आयोजनाले दीनकै १७ लाख लिटर पानी  उत्पादन गर्ने तथा सो वार्ड सहित आसपासका वडाका  ६ हजार बढी जनशख्यालाई खानेपानी पुर्‍याउने  र ५ हजार घर धुरीमा थप नयाँ धारा जडान गर्ने मन्त्री यादवले सो अवसरमा जानकारी गराउनुभयो ।