राष्ट्रिय सभा बैठकमा भ्रष्टाचार, विपद् व्यवस्थापन र सुशासनका विषयमा सांसदहरूको धारणा
'मनसुनजन्य विपद् सामना गर्न तीनै तहको सरकार सतर्क रहनुपर्ने सुझाव'
काठमाडौँ । राष्ट्रियसभाका सांसदहरुले भ्रष्टाचार प्रकरणमा मुछिएका जोसुकै व्यक्ति भए पनि प्रमाण सङ्कलन गरी छानविन गर्नुपर्नेमा जोड दिनुभएको छ ।
सभाको आजको बैठकको विशेष समयमा नेकपा एमालेका सांसद गोपाल भट्टराईले भ्रष्टाचारमा संलग्न भएकाहरूको बचाउ गर्न भ्रम सिर्जना नगरी सम्बन्धित निकायलाई छानबिनको जिम्मेवारी दिनुपर्ने बताउनुभयो ।
नेपाली कांग्रेसका सांसद युवराज शर्माले तल्लो तहका कर्मचारीदेखि उच्च पदमा बसेका नेताहरू समेतले राज्यको ढुकुटी रित्याउने गरी भ्रष्टाचार गरेको भन्दै राज्यको सम्पत्ति हिनामिना गर्नेमाथि उचित छानविन हुनुपर्ने विचार व्यक्त गर्नुभयो ।
बैठकमा नेकपा माओवादी केन्द्रका सांसद उर्मिला अर्यालले विगतमा मनसुनजन्य विपत्तिबाट जनधनको ठूलो क्षति पुगेको भन्दै यस वर्ष सरकारले विपद् पूर्वतयारी, प्रतिकार्य, पुनर्निर्माण र पुनर्स्थापनामा तीनै तहको सरकारलाई तयारी अवस्थामा राख्नुपर्नेमा जोड दिनुभयो ।
त्यसैगरी एकीकृत समाजवादी पार्टीका सांसद राजेन्द्रलक्ष्मी गैरेले सरकारले ल्याएको बजेटले सुशासनलाई प्राथमिकता नदिएको बताउनुभयो ।
बैठकमा जनता समाजवादी पार्टीका सांसद मोहम्मद खालिदले सीमावर्ती क्षेत्रमा दुईतर्फका जनता नातागोतामा गाँसिएकाले विवाहजस्तो कार्यमा पाएको उपहारको समेत भन्सार शुल्क लिन नहुने बताउनुभयो ।
बैठकको विशेष समयमा सांसदहरुले विशेष समयमा बोल्ने क्रम जारी छ ।
प्रतिक्रिया राख्नुहोस्