हुम्लाको नाम्खामा पुग्यो राहत सामग्री 

काठमाडौँ। ‎हिमताल फुटेर आएको बाढी र पहिरोबाट प्रभावित हुम्लाको नाम्खा गाउँपालिका-६, तिलगाउँमा राहत सामग्री पठाइएको छ।

‎हुम्लाका प्रमुख जिल्ला अधिकारी नारायण पाण्डेयले जिल्ला विपद् व्यवस्थापन व्यवस्थापन समितिबाट चामल लगायतका राहत सामग्रीहरु पठाइएको जानकारी दिनुभयो ।

उहाँका अनुसार १० क्विन्टल चामल, १०० लिटर तिल, दुई क्विन्टल नुन, दुई क्विन्टल नै चिनी, ३० क्विन्टल मैदा, १र१ क्विन्टल भुजा, चिउरा, १० पाकेट चिया पठाइएको छ। ‎यस्तै आलु, सागसब्जी, साबुनदेखि औषधीहरू पठाइएको उहाँले बताउनुभयो। चारवटा त्रिपाल र १० बोरा सिमेन्ट पनि पठाइएको छ । “सिमिकोटबाट हामीले गाडीमा सामान पठाएको हो, सामान पुगिसकेको छ ” उनले उहाँले भन्नुभयो ।

‎‎तिलगाउँमा बाढी र पहिराका कारण १८ वटा घरधुरी प्रभावित छन्। ‎गाउँ नजिक पहिरो पुग्दा बस्ती नै जोखिममा परेकाले तिलगाउँवासी खोला पारी फाँटमा बसिरहेका छन् ।

‎बाढी र पहिरोले बिजुली बत्ती, खानेपानी, सिँचाइ, पुलपुलेला लगायत सार्वजनिक पूर्वाधारमा क्षति भएको थियो । राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत दिनेश भट्टले राहत सामग्रीका साथै विज्ञको टोली हुम्ला पठाइएको बताउनु भयो । उहाँका अनुसार घटनाको अध्ययनका लागि वरिष्ठ डिभिजन इन्जिनियर सुशील कुमार श्रेष्ठ, भूगर्भविद् शिव प्रसाद बास्तोला, मौसमविद् सौहाद्र जोशीसहित विपद् प्राधिकरणको टोली हुम्ला पठाइएको छ । 

‎