डिजिटल ट्यालेन्टका लागि आवेदन खुला

काठमाडौँ । हुवावेले नेपालले सूचना प्रविधि र उद्यमशीलता प्रवर्द्धन गर्ने उद्देश्यले सञ्चालन गर्दै आएको ‘सिड्स फर द फ्युचर, २०२५’का लागि आवेदन खुला गरेको छ ।

‘बिल्डिङ अ फुल्ली कनेक्टेड, इन्टेलिजेन्ट वर्ल्ड वाई कल्टिभेटिङ डिजिटल ट्यालेन्ट’ नारासहित सुरु भएको उक्त कार्यक्रम नेपालका विभिन्न कलेज तथा विश्वविद्यालयमा स्नातक तह अध्ययनरत सूचना प्रविधिमा रुचि राख्नेका लागि लक्षित गरिएको जनाइएको छ । 

विद्यार्थीलाई अन्तरराष्ट्रियस्तरसम्मको पहुँच स्थापित गर्न सघाउने उक्त कार्यक्रममा सहभागी हुन योग्यता पुगेका इच्छुक विद्यार्थीले यही वैशाख २५ गतेदेखि जेठ ११ गते ९मे ७ तारिखदेखि मे २५० सम्म आवेदन दिनसक्ने हुवावे नेपालले जनाएको छ ।

“हुवावेको यो कार्यक्रम सूचना प्रविधिमा रुचि राख्ने स्नातक तहमा अध्ययनरत विद्यार्थीका लक्षित गरिएको छ”, हुवावेले भनेको छ, “इनोभेसन, डिजिटलाइजेशन, दिगोपन, उद्यमशीलता तथा सांस्कृतिक आदानप्रदानमा रुचि राख्नेका लागि यो कार्यक्रम तयार पारिएको हो ।”

नेपालमा आयोजना हुन लागेको यो छैटौँ संस्करणको कार्यक्रम हो । हुवावेले सन् २०१९ देखि नेपालमा यो कार्यक्रम सञ्चालन गरिसकेको छ । नेपालबाट हालसम्म यस कार्यक्रममा १५० जना सहभागी भइसकेका छन् ।

आवेदकहरूमध्येबाट निर्णायक मण्डलले विभिन्न चरणमार्फत सहभागी छनोट गर्छन् । छनोट भएका विद्यार्थीहरू नेपालमा आयोजना हुने विभिन्न कार्यक्रममा सक्रिय रुपमा सहभागी हुनेछन् । त्यस अवसरमा उनीहरू कार्यशाला, अध्ययन भ्रमण, अन्तर्वार्ता र प्रस्तुतीकरणलगायत चरणमा सहभागी हुनेछन् ।

विभिन्न चरणपछि छनोट हुने उत्कृष्ट विद्यार्थीले चीनमा आयोजना हुने प्रशिक्षण तथा क्षेत्रीय प्रतिस्पर्धामा भाग लिने अवसर प्राप्त गर्नेछन् । क्षेत्रीय प्रतिस्पर्धामा उत्कृष्ट हुने विश्वव्यापी प्रतिस्पर्धामा सहभागी हुन पाउनेछन् । चीनमा रहँदा उनीहरूले अत्याधुनिक प्रविधिसम्बन्धी कार्यशालामा भाग लिनेछन् ।

उनीहरूले आफ्नो उद्यमशीलतासम्बन्धी अवधारणा सुनाउने अवसरका साथै हुवावेका तथा अन्य अन्तर्राष्ट्रिय विज्ञमार्फत परामर्श प्राप्त गर्नेछन् । चीनमा आयोजना हुने कार्यक्रममा १०० भन्दाबढी देशका सूचना प्रविधिमा रुचि राख्ने व्यक्तिहरूसँग विद्यार्थीहरूले साक्षात्कार गर्ने अवसर प्राप्त गर्नेछन् । डिजिटल प्रतिभा विकासमा सघाउन, भविष्यका डिजिटल क्षेत्रका नेतृत्वकर्तालाई प्रविधि र अन्तर–सांस्कृतिक अनुभव प्रदान गर्न कार्यक्रम सफल हुने विश्वास गरिएको छ ।

कार्यक्रममा सहभागीहरूले अन्तर्राष्ट्रिय ब्राण्डसँग काम गर्न पाउने अवसर प्राप्त गर्नेछन् । हुवावेका अनुसार सहभागीहरूले कृत्रिम बौद्धिक (आर्टिफिसियल इन्टेलिजेन्स), फाइभजी, ग्रीन टेक र पछिल्लो समय सूचना प्रविधिमा विकसित जानकारी हासिल गर्नेछन् । सन् २००८ मा थाइल्याण्डबाट सुरु भएको यस कार्यक्रमबाट हालसम्म १४२ देशका १९ हजारभन्दा बढी विद्यार्थीहरूलाई लाभान्वित भइसकेका छन् । रासस