तपाईँ सुन्दै हुनुहुन्छः

भीमनारायण गोल्डकप : नमोबुद्ध युथ क्लब फाइनलमा

धनकुटा । धनकुटामा जारी १७औँ संस्करणको शहीद भीमनारायण गोल्डकप फुटबल प्रतियोगितामा नमोबुद्ध युथ फुटबल क्लब सप्तरी फाइनलमा प्रवेश गरेको छ । 

धनकुटाको तल्लो टुँडिखेलमा बिहीबार सम्पन्न पहिलो सेमिफाइनल खेलमा साविक विजेता बिर्तामोड युनाइटेड क्लब झापालाई ३–१ गोल अन्तरले हराउँदै नमोबुद्ध उपाधि नजिक पुगेको हो । 

खेलको १४औँ मिनेटमा नमोबुद्धका मोहित गुरुङले गोल गर्दै टोलीलाई अग्रता दिलाएका थिए। त्यसपछि खेलको २०औँ र ९०औँ मिनेटमा नमोबुद्धका सिर्जनराज गौतमले गोल गरे भने खेलको २६ औँ मिनेटमा विर्तामोडका गिल्सल कन्दङ्वाले सान्त्वना गोल गरे । खेलमा नमोबुद्धका सिर्जनराज गौतम म्यान अफ द म्याच घोषित हुँदै नगद ५ हजार ५ हात पारे ।

बिर्तामोडले पटक पटक गोल गर्ने मौका गुमाउँदा पराजित हुन पुग्यो। नमोबुद्धले उपाधिका लागि शुक्रबार हुने दोस्रो सेमिफाइनल खेलको विजेतासँग शनिबार प्रतिस्पर्धा गर्नेछ । 

दोस्रो सेमिफाइनल खेल शुक्रबार सशस्त्र प्रहरी बलको एपीएफ क्लब काठमाडौँ र गाईघाट फुटबल क्लब उदयपुरबीच हुनेछ ।

दर्शकका लागि निःशुल्क प्रवेशको व्यवस्था गरिएको प्रतियोगिताको बिजेताले नगद ५ लाख र उपविजेताले २ लाख ५० हजार रुपैयाँसहित ट्रफी, मेडल, कप, प्रमाणपत्र हात पार्नेछन् ।  सबैभन्दा बढी गोल गर्ने, म्यान अफ द म्याच तथा सर्वोत्कृष्ट खेलाडीले पनि नगद हात पार्ने आयोजकले जनाएको छ ।

२०५५ सालमा शुरु प्रतियोगिता केही वर्षको स्थगनपछि २०६३ सालदेखि नियमित सञ्चालन हुँदै आएको छ । शहीद भीमनारायण श्रेष्ठको स्मृतिमा प्रतियोगिता सञ्चालन हुँदै आएको छ । 

विराटनगरमा तत्कालीन राजा वीरेन्द्रलाई बम हानेको आरोपमा पक्राउ परेका भीमनारायण श्रेष्ठलाई २०३५ सालमा गोली हानी हत्या गरिएको थियो । सरकारले श्रेष्ठलाई २०७३ सालमा राष्ट्रिय सहिद घोषणा गरेको थियो ।

प्रतिक्रिया राख्नुहोस्

Back to top button