केही नेपाल ऐनलाई संशोधन गर्न बनेको विधेयक कानुन समितिबाट पारित 

काठमाडौँ । प्रतिनिधि सभा कानुन, न्याय तथा मानव अधिकार समितिले केही नेपाल ऐनलाई संशोधन गर्न बनेको विधेयक २०८० सर्व सम्मतिले पारित गरेको छ । 

समितिको आज बसेको बैठकले विधेयकको मस्यौदा प्रतिवेदन २०८१ माथि छलफल गरी सामान्य संशोधन सहित पारित गरेको समिति सभापति बिमला सुवेदीले बताउनुभयो । 

मस्यौदा प्रतिवेदनमाथिको छलफलमा सांसदहरु शेरबहादुर कुवर, पूर्णबहादुर घर्ती, रञ्जुकुमारी झा, नानकलै थापा, जीवन परियार, सुशीला थिङ र महेश कुमार बर्तौलाले विधेयकको मस्यौदा प्रतिवेदनमाथि आ–आफ्नो धारणा राख्नुभएको थियो । 

समितिले वैदेशिक रोजगार ऐन २०६४ को दफा २५ मा रहेको स्पष्टीकरणमा परिवारको परिभाषामा थप गर्नु आवश्यक देखिएकाले उक्त कानुनमा समसामयिक सुधार र परिमार्जन गर्ने कार्य अगाडी बढाउन श्रम रोजगार तथा सामाजिक सुरक्षा मन्त्रालयलाई सुझाव दिएको छ ।

यसैगरी समितिले चैत १५ गते काठमाडौँको तीनकुनेमा पूर्व राजावादीहरूको आन्दोलनका क्रममा भएको घटनाले मानव अधिकार उलङ्घन भएको निष्कर्ष निकाल्दै गृहमन्त्री रमेश लेखकसँग छलफल गर्ने निर्णय गरेको छ ।

कानुन, न्याय तथा संसदीय मामिला मन्त्री अजय कुमार चौरसियाले चैत १५ गते काठमाडौँको तीनकुनेमा भएको घटनाका विषयमा सरकारले छानबिन कार्य अगाडी बढाएको र छानबिनपछि सत्यतथ्य बाहिर ल्याउने जानकारी गराउनुभयो । 

बैठकमा सासंदहरुले राजावादीहरूको आम सभाका क्रममा मानव अधिकार उलङ्घन गर्नेगरी भएको घटनाको निष्पक्ष छानबिन हुनुपर्ने, घटनाको सत्यतथ्य बाहिर ल्याउन र दोषीलाई कारबाही गर्न ढिलाइ गर्न नहुने, न्यायिक समिति गठन गरेर छानविन अगाडी बढाउनु पर्ने लगायतका धारणा राख्नुभएको थियो ।