पत्रकार सुरेश रजकको हत्याविरुद्ध पत्रकार महासङ्घ मकवानपुरद्वारा विरोध प्रदर्शन

मकवानपुर । रिपोर्टिङका क्रममा ज्यान गुमाएका फोटो पत्रकार तथा टेलिभिजन क्यामेरा पर्सन सुरेश रजकको हत्याविरुद्ध नेपाल पत्रकार महासङ्घ मकवानपुर शाखाले विरोध प्रदर्शन गरेको छ।

महासङ्घले पत्रकारिता पेसालाई कमजोर पार्ने तथा सञ्चारकर्मीहरूलाई लक्षित गरी गरिने कुनै पनि आक्रमण स्वीकार्य नहुने स्पष्ट पारेको छ। महासङ्घले जारी गरेको विज्ञप्तिमा भनिएको छ, “राजावादी मात्र नभई जुनसुकै राजनीतिक विचारधाराका व्यक्तिले पनि संविधानले प्रत्याभूत गरेको पत्रकारिताको स्वतन्त्रतालाई कमजोर पार्ने प्रयास गर्नुहुँदैन।” 

महासङ्घले पत्रकारसहित सम्पूर्ण नागरिकको सुरक्षा सुनिश्चित गर्न राज्यलाई आग्रह गरेको छ। साथै, आम नागरिकले शान्ति र सुरक्षा महसुस गर्न सक्ने वातावरण तयार गर्नुपर्नेमा जोड दिएको छ।

नेपाल पत्रकार महासङ्घ मकवानपुरको आयोजना तथा पत्रकार महासङ्घ बागमती प्रदेशको समन्वयमा आज हेटौँडामा पत्रकार हत्याविरुद्ध विरोध प्रदर्शन गरिएको हो। समाचार सङ्कलनका क्रममा पत्रकारको हत्या भएको र आम सञ्चारमाध्यममाथि आक्रमण गरिएको विरोधमा मकवानपुरका पत्रकारहरू पनि देशव्यापी आन्दोलनमा सहभागी भएका छन्।

हेटौँडाको पल्पसा सभागृहबाट सुरु भएको पत्रकारहरूको प्रदर्शन मकवानपुर उद्योग वाणिज्य संघ, पिपलबोट, बुद्ध चोक हुँदै स्कुरोडमा पुगेर सभामा परिणत भएको थियो।

शुक्रबार राजावादी प्रदर्शनका क्रममा एभिन्युज टेलिभिजनका पत्रकार सुरेश रजकको मृत्यु भएको थियो। उनले भिडियो खिचिरहेको घरमा राजावादी प्रदर्शनकारीहरूले आगो लगाएपछि जलेर उनको मृत्यु भएको थियो। सो घटनाको विरोधमा नेपाल पत्रकार महासङ्घले हेटौँडामा प्रदर्शन गरेको हो।

संयोगवश, आज नेपाल पत्रकार महासङ्घको स्थापना दिवससमेत रहेकाले महासङ्घले पूर्वनिर्धारित कार्यक्रम स्थगित गरी विरोध प्रदर्शन गरेको हो।

कार्यक्रममा नेपाल पत्रकार महासङ्घ बागमती प्रदेशका संस्थापक अध्यक्ष प्रताप विष्ट, महासङ्घ बागमती प्रदेशका उपाध्यक्ष हरि हुमागाईँ, महासङ्घ मकवानपुरका अध्यक्ष बालकृष्ण अधिकारी, प्रेस युनियन मकवानपुरका अध्यक्ष सुवास विडारी, प्रेस चौतारी मकवानपुरकी अध्यक्ष सरिता दाहाल, गैरसरकारी संस्था महासङ्घकी आरती पाठकलगायतले पत्रकार हत्याको विरोध गर्दै दोषीलाई कडा कारबाहीको माग गरेका छन्।