बैजनाथमा भूमिहीन, सुकुम्बासी र अव्यवस्थित बसोबासीलाई निस्सा वितरण सुरु

बाँके । बाँकेको बैजनाथ गाउँपालिका–३ मा भूमिहीन दलित, भूमिहीन सुकुम्बासी र अव्यवस्थित बसोबासीहरूलाई निस्सा वितरण सुरु गरिएको छ। गाउँपालिकाले वडा नम्बर ४ मा ३० जनालाई निस्सा वितरण गरेपछि वडा नम्बर ३ मा पनि औपचारिक रूपमा कार्यक्रम सुरु गरेको हो।

वडा नम्बर ३ मा  आज एक कार्यक्रमबीच गाउँपालिकाका अध्यक्ष प्रकाश बहादुर शाहीको प्रमुख आतिथ्यतामा ३० जनालाई निस्सा वितरण गरिएको वडा सचिव तिलक केसीले जानकारी दिनुभयो। उहाँका अनुसार ७ जना भूमिहीन दलित, ८ जना भूमिहीन सुकुम्बासी र १० जना अव्यवस्थित बसोबासी गरी कुल ३० जनाले निस्सा पाएका छन्।

वडा सचिव केसीले भन्नुभयो ‘अब वडाका विभिन्न टोलमा गएर निस्सा वितरण गर्नेछौँ। चैत १८ गतेसम्म निस्सा वितरण अभियान सञ्चालन हुनेछ।’

गाउँपालिकाका अध्यक्ष शाहीले नागरिकका समस्या समाधानलाई प्राथमिकतामा राखेर कार्यक्रम अगाडि बढाइएको उल्लेख गर्नुभयो।

त्यसैगरी, भूमि आयोग बाँकेका अध्यक्ष घननाथ खनाल ले बैजनाथ गाउँपालिकाको कार्यप्रति सन्तोष व्यक्त गर्दै अन्य वडाहरूमा छिटो भन्दा छिटो निस्सा वितरण कार्यक्रम सञ्चालन गर्नुपर्ने धारणा राख्नुभयो।

वडा कार्यालयका अनुसार वडा नम्बर ३ मा २,१०० जना भूमिहीन, दलित, सुकुम्बासी र अव्यवस्थित बसोबासी रहेको तथ्याङ्क छ। निस्सा वितरणको यो अभियानले भूमिहीन नागरिकहरूलाई भूमि अधिकारको सुनिश्चितता दिनका लागि महत्वपूर्ण कदम सावित हुने विश्वास गरिएको छ।