लोक सेवा आयोगको राष्ट्रिय सम्मेलन विराटनगरमा शुरु

विराटनगर । लोक सेवा आयोगको पाँचौँ राष्ट्रिय सम्मेलन विराटनगरमा शुरु भएको छ । सम्मेलनमा सात वटै प्रदेशका प्रदेश लोक सेवा आयोग अध्यक्ष, आयोगका सचिव तथा सदस्यहरूको सहभागिता रहेको छ ।

दुई दिनसम्म चल्ने सम्मेलनले विराटनगर घोषणापत्र जारी गर्ने जनाइएको छ । सम्मेलनको उद्घाटन गर्नुहुँदै लोक सेवा आयोगका अध्यक्ष माधव रेग्मीले नेपाली जनताको आस्थाको धरोहरका रुपमा रहेको लोक सेवा आयोगले कुनै दबाब र प्रभावमा नपरी संविधानको मुल मर्म अनुसार काम गर्दै आएको बताउनुभयो । 

उहाँले आयोगको मूल्य, मान्यता र मर्यादा कायम राख्न आफूहरू प्रतिबद्ध रहेको बताउनुभयो । 

कोशी प्रदेशका प्रमुख सचिव केदारनाथ शर्माले कर्मचारी छनौट प्रक्रियामा आयोगको भूमिका निष्पच्छ र स्वच्छ रहेको बताउनुभयो । 

कार्यक्रममा सात वटै प्रदेशका प्रदेश लोक सेवा आयोगका अध्यक्षहरूले आयोगले गर्दै आएको सेवा प्रवाहका विषयमा जानकारी गराउनुभएको थियो । 

कार्यक्रममा मोरङका प्रमुख जिल्ला अधिकारी इन्द्रदेव यादवले लोक सेवा आयोगको गरिमा र त्यसको महत्वका विषयमा चर्चा गर्नुभयो ।