भूमे ग्रामीण आँखा केन्द्र रुकुम पूर्वको उद्घाटन
रुकुम पूर्व । भूमे ग्रामीण आँखा केन्द्र रुकुम पूर्वको उद्घाटन गरिएको छ । बुधबार २१ गते एक कार्यक्रमबीच भूमे गाउँपालिका–२ खाबाङ बगरमा आँखा केन्द्रको उद्घाटन गरिएको हो ।

भूमे ग्रामीण आँखा केन्द्रमा आधारभूत सेवा पूर्व तयारीका प्राविधिक एवं भौतिक पक्षका सम्पूर्ण कार्यहरू पुरा भइसकेको हुँदा उद्घाटन गरिएको भूमे गाउँपालिकाले जनाएको छ । आँखा केन्द्रमा अबदेखि आँखासम्बन्धी जाँच र चश्मा बनाउने लगायतका आधारभूत सेवा निरन्तर प्रवाह हुने बताइएको छ । केन्द्रबाट रुकुम पूर्वको तीनवटै गाउँपालिका तथा छिमेकी जिल्लाका नागरिकहरूले पनि सेवा लिने विश्वास गरिएको छ ।
नेपाल आँखा कार्यक्रम तिलगंगा प्रतिष्ठान गौशाला, काठमाडौँको सहकार्य, नेपाल रेडक्रस सोसाइटी जिल्ला शाखा, रोल्पाको समन्वय, द फ्रेड हलोज फाउन्डेसन अस्ट्रेलियाको सहयोग र भूमे गाउँपालिका रुकुम पूर्वको आयोजनामा भूमे ग्रामीण आँखा केन्द्र सञ्चालन भएको गाउँपालिकाका प्रमुख प्रशासकीय अधिकृत देवीलाल विकले जानकारी दिनुभयो ।
भूमे गाउँपालिकाका अध्यक्ष होम प्रकाश श्रेष्ठले अब यो आँखा केन्द्रबाट सिङ्गो रूकुमेली नागरिकले सेवा लिने बताउनुभयो ।
प्रतिक्रिया राख्नुहोस्