‘प्रदेशको आर्थिक स्रोत बलियो हुने गरी योजना बनाउनुपर्छ’

विराटनगर । कोशी प्रदेशका मुख्यमन्त्री हिक्मतकुमार कार्कीले पहाडी क्षेत्रको बसाइसराई रोक्ने गरी योजना बनाउनुपर्ने बताउनुभएको छ । 

कोशी प्रदेश योजना आयोगले विराटनगरमा आज आयोजना गरेको प्रदेश स्तरीय आयोजना तर्जुमा गोष्ठीलाई सम्बोधन गर्दै मुख्यमन्त्री कार्कीले पहाडबाट तराईमा बसाई सर्ने प्रवृत्ति अत्यधिक रहेकोले त्यसलाई रोक्ने गरी योजनाहरू बनाएर कार्यान्वयन गर्नुपर्नेमा जोड दिनुभयो । 

हिमाल तथा पहाडी क्षेत्रको जनजीवन सहज बनाउने रोजगारी सिर्जना गर्ने विषयलाई प्राथमिकता दिनुपर्नेमा जोड दिनुभयो ।

लगानी गरेका कामहरूबाट आम्दानी समेत हुने गरी योजना बनाएमा  प्रदेशको आर्थिक स्रोत पनि बलियो हुने मुख्यमन्त्री कार्कीको भनाई थियो ।

मुख्यमन्त्री कार्कीले प्रदेशको स्रोत सीमित भएकोले अब लगानी गर्दा भौतिक पूर्वाधार तथा सडकमा मात्र नभई पर्यटनको क्षेत्रको विकासमा समेत लगानी गर्नु आवश्यक रहेको बताउनुभयो ।

कार्यक्रममा प्रदेशका आर्थिक मामिला तथा योजना मन्त्री राम बहादुर रानाले प्रदेश प्रदेशमा सन्तुलित विकास गर्न र गोजीबाट योजना हाल्ने प्रवृत्तिको अन्त्य गर्न प्रदेश आयोजना बैङ्क कामयाबी हुने बताउनुभयो ।

कार्यक्रममा कोशी प्रदेशका प्रदेश सभा सदस्य, मन्त्री तथा मन्त्रालयका सचिवहरूको सहभागिता रहेको थियो ।