उदयपुरमा दनुवारी खाना परिकार तथा सांस्कृतिक उत्सव–२०८१ सुरु 

उदयपुर । उदयपुरको त्रियुगा नगरपालिका–८ बैरेनी चौरमा पहिलो दनुवारी खाना परिकार तथा सांस्कृतिक उत्सव–२०८१ सुरु गरिएको छ ।

दनुवारी खाना परिकार तथा सांस्कृतिक उत्सव–२०८१ को कोशी प्रदेश सभाका उपसभामुख सृजना दनुवारले शुक्रबार एक कार्यक्रमबीच उद्घाटन गर्नुभयो ।

महोत्सवको उद्घाटन गर्दै कोशी प्रदेश सभाका उपसभामुख दनुवारले दनुवारी खाना महोत्सवले सामाजिक र आर्थिक अवस्थालाई बलियो बनाउन सहयोग पुर्‍याउने बताउँदै यसले हराउँदै गएको संस्कृतिकालाई पुनर्ताजगी गर्ने बताउनुभयो । उहाँले आर्थिक अवस्था सुधार गर्न पनि यस किसिमका उत्सवले महत्वपूर्ण मद्दत पुग्ने बताउनुभयो । 

त्रियुगा नगरपालिकाका उपप्रमुख महेश्वरी राईले नेपालमा रहेका आदिवासी जनजातिले आयोजना गर्ने महोत्सवले स्थानीय समुदायको भाषा कला साहित्यलाई र पहिचानको प्रवर्द्धन गर्ने बताउनुभयो ।

कार्यक्रममा उपस्थित काभ्रे जिल्ला पाँचखाल नगरपालिकाका उपप्रमुख सूर्यमाया दनुवारले दनुवार कुनै उपजाति वा उप थर नभएको बताउँदै दनुवार जातिलाई माझी जातीको उपजातिमा राखेकोमा आपत्ति जनाउँदै सच्याउन माग गर्नुभयो ।

दुई दिन सम्म सञ्चालन हुने दनुवारी खान महोत्सव महिला सशक्तिकरण श्रोत केन्द्र राजावासको आयोजनामा भइरहेको  छ । महोत्सवमा १५ वटा दनुवारी खानाका स्टल राखिएको छ भने दनुवार जातिले माछा मार्न प्रयोग गर्ने विभिन्न प्रकारका सामानहरू चट्टाई, गुन्द्री, ढडिया, थुन्से लगायतका सामानहरू प्रदर्शनीमा राखिएको छ ।