अटोमा ठोक्किएर स्कुटर चालकको मृत्यु 

चितवन  । भरतपुरमा अटोमा ठोक्किएर स्कुटर चालकको मृत्यु भएको छ । भरतपुर महानगरपालिका वडा नं–११, भोजाडस्थित अटोमा स्कुटर ठोक्किएर दुर्घटना हुँदा घाइते भएका स्कुटर चालक चक्र बहादुर घिसिङको मृत्यु भएको हो  ।

जिल्ला प्रहरी कार्यालय चितवनका अनुसार ना २ ह २५३५ नम्बरको अटोमा बा ७२ प ८९९९ नम्बरको स्कुटर ठोक्किँदा स्कुटर चालक रत्ननगर–१३ बस्ने ५१ वर्षीय  घिसिङ गम्भीर घाइते भएका थिए । मापसे गरेका घिसिङलाई भरतपुर अस्पतालबाट नयाँ मेडिकल कलेज रेफर गरिएको थियो । त्यसपछि थप उपचारका लागि न्युरो अस्पताल बाँसबारी काठमाडौँ रेफर गरिएको थियो । पुनः नयाँ मेडिकल कलेजमा ल्याइ उपचार भइरहेकोमा डाक्टरले उपचार सम्भव नभएको सल्लाह दिएपछि घाइतेका आफन्तले घर लगेका थिए ।

सोमबार बेलुकी ४ः०० बजे घिसिङको घरमै मृत्यु भएपछि प्रहरीले मुचुल्कालगायत प्रारम्भिक कार्य गरी पोस्टमार्टमका लागि भरतपुर सरकारी अस्पताल पठाइएको थियो । प्रहरीले दुवै सवारीसाधन नियन्त्रणमा रहेको र अटो चालक सम्पर्कमा रहेको जनाएको छ ।