पोखरामा फोहोर व्यवस्थापन संकट : जनप्रतिनिधिहरूको अदूरदर्शिता

पोखरा । पोखरामा फोहोर व्यवस्थापनको समस्या झनै गम्भीर बनेको छ। ६ महिनाको अस्थायी समाधानको रूपमा बाच्छेबुडुवाबाट लामेआहाल ल्याण्डफिल साइट सारिएको भएता पनि साढे २ वर्षपछि पनि नयाँ फोहोर प्रशोधन केन्द्र निर्माणको कार्य सम्पन्न भएको छैन।

मेयर धनराज आचार्यको नेतृत्वमा पोखरामा फोहोर प्रशोधन केन्द्र निर्माणको योजना बनेको थियो, तर अहिलेसम्म केही प्रगति भएको छैन। लामेआहालमा फोहोर फाल्ने सम्झौतामा माघ २३ देखि म्याद सकिएको छ, जसपछि पोखराका चोकचोकमा फोहोर सडकमै थुप्रिएका छन्।

महानगरका फोहोर बोक्ने गाडीहरू फोहोरले भरिएका छन्, र ३२ नम्बर वडाका नागरिकहरूले फोहोर फाल्न रोक लगाएका छन्। महानगरपालिकाको नेतृत्वले समयमै समाधान नदिँदा स्थानीयहरूले असहयोग जनाएका छन्।

स्थायी फोहोर व्यवस्थापन केन्द्र निर्माणका लागि प्रक्रिया सुरु भए पनि जग्गा प्राप्ति समस्याका कारण रोकिएको छ। पोखरा महानगरले फोहोर संकलनका लागि ८ वटा कम्पनीलाई जिम्मा दिएको भएता पनि दीर्घकालीन समाधान अझै टारिएको छ।