संविधानका आधारभूत विषयलाई चलाउनु हुँदैन : मन्त्री पौडेल
भक्तपुर । स्वास्थ्य तथा जनसङ्ख्या मन्त्री प्रदीप पौडेलले अहिलेको व्यवस्थालाई थप बलियो बनाउने गरी आवश्यकताका आधारमा संविधान संशोधन हुनुपर्ने बताउनुभएको छ ।
जिपी कोइराला फाउण्डेसनले आज भक्तपुरमा आयोजना गरेको ‘राजनीतिका शिखर पुरुष गिरिजाप्रसाद कोइराला र वर्तमान राजनीति’ विषयक विचार गोष्ठी कार्यक्रममा मन्त्री पौडेलले संविधानका आधारभूत विषयहरूलाई चलाउन नहुने बताउनुभयो ।
उहाँले सङ्घीय सांसद, प्रदेश सांसद र मन्त्रीमण्डलको सङ्ख्या घटाउने र कर्मचारी संयन्त्रलाई न्युनिकरण गर्ने गरी संविधान संशोधन गर्नुपर्ने बताउनुभयो ।
संविधान परिवर्तनको विषय यसको आधारभूत मान्यता बाहेक समावेशिता र समानुपातिक प्रतिनिधित्वको विषयलाई अझ बलियो बनाउने हुनुपर्ने बताउनुभयो ।
शिक्षा र स्वास्थ्य क्षेत्रलाई प्राथमिकतामा राख्नुपर्ने बताउँदै सरकारले चालु खर्च न्यूनीकरणमा पनि जोड दिनुपर्ने बताउनुभयो ।
कांग्रेस जनताको पक्षमा काम गरेर देखाउन सत्तामा गएको उल्लेख गर्नुहुँदै उहाँले आफूले मन्त्री भएपछि उपलब्धिहरूको फेहरिस्त बनाउने कोशिश गरिरहेको बताउनुभयो ।
मन्त्री भएर सरकारमा गएपछि मन्त्रीहरूले गरेका कामका प्रशंसा पार्टीका नेता तथा कार्यकर्ताले गर्न पाउनुपर्ने भन्दै उहाँले जनतामा त्यो दृष्टान्त पुर्याउन पाउनुपर्ने तर्फ आफु सचेत रहेको बताउनुभयो ।
सबै तहको सत्तालाई आम नागरिकको पक्षमा प्रयोग गर्नुपर्नेमा जोड दिँदै उहाँले जनताले सुशासन खोजेकोले सिङ्गो पार्टी पङ्क्तिले सत्तामा गएकाहरूलाई त्यसका लागि दबाब दिनुपर्ने बताउनुभयो ।
मन्त्री पौडेलले पार्टीको महाधिवेशन २०८३ सालभित्रै हुनुपर्ने बताउँदै पार्टी पछिल्लो पुस्ताका लागि लोकतन्त्रको पहरेदार शक्तिको रुपमा स्थापित हुनुपर्नेमा जोड दिनुभयो ।
प्रतिक्रिया राख्नुहोस्