‘बालबालिकामाथि अनलाइन यौन हिंसा रोक्न समन्वय गरेर काम गरौँ’

काठमाडाैं ।बालबालिकामाथि अनलाइनका माध्यमबाट बढ्दो यौन हिंसा रोक्न राज्यका संयन्त्रका साथै इन्टरनेट सेवाप्रदायकहरूले पनि जिम्मेवारी वहन गर्नुपर्नेमा जोड दिइएको छ ।

बालबालिकाको क्षेत्रमा क्रियाशील सिविन नेपालले शुक्रबार र शनिबार काठमाडाैंमा आयोजना गरेको दुईदिने कार्यशालामा सहभागीहरूले बालबालिकाहरूमाथि भइरहेको अनलाइन याैन हिंसा रोक्न राज्यले गरिरहेको प्रयास प्रभावकारी बनाइनुपर्ने र इन्टरनेट सेवाप्रदायकहरूले पनि जिम्मेवारी वहन गर्नुपर्ने बताएका हुन् ।

पछिल्लो समय इन्टरनेटमा बालबालिकाहरूले सानै उमेरमा सहज पहुँच पाउँदा उनीहरू याैन हिंसाको गम्भीर जोखिममा रहेकाले सचेतना अभियानलाई बढावा दिनुपर्नेमा सहभागीहरूको जोड थियो ।

नेपाल प्रहरी साइबर ब्युरोका प्रवक्ता प्रहरी उपरीक्षक दीपक अवस्थीले अनलाइन माध्यमबाट हुने याैन हिंसा रोक्न अभिभावक र बालबालिकालक्षित सचेतना अभियानलाई देशव्यापी बनाइनुपर्ने बताए ।

अवस्थीले बालबालिकाहरूमाथि अनलाइनका माध्यमबाट हुने हिंसाका घटनाको अनुसन्धानलाई ब्युरोले उच्च प्राथमिकता दिइरहेको बताए । पीडितहरू साइबर ब्युरोमा उजुरी दिन जाँदा प्रहरीबाट पर्याप्त सहयोग नपाइने गरेको सहभागीहरूको गुनासोप्रति प्रवक्ता अवस्थीले जनशक्ति र संरचना थपेर साइबर ब्युरोलाई प्रभावशाली र गुनासोरहित बनाउने प्रयास भइरहेकाे बताए ।

अवस्थीले प्रविधिको विकाससँगै अपराध पनि बढेकाले सामाजिक सञ्जाल चलाउँदा उच्च सावधानी अपनाउनुपर्ने पनि बताए ।

कार्यक्रममा नेपाल दूरसञ्चार प्राधिकरणका पूर्ववरिष्ठ निर्देशक आनन्दराज खनालले साइबर अपराधको बढ्दो जोखिम कम गर्न सरकारी तथा गैरसरकारी संघसंस्थाहरूले समन्वय गरेर काम गर्नुको विकल्प नरहेको बताए । उनले एक जना पनि बालबालिका हिंसामा पर्न नहुने गरी सबैले चनाखो हुनुपर्नेमा जोड दिए ।

इन्टरनेट सेवाप्रदायक संस्था ‘इस्पान’का प्रमुख सुवास खड्काले इन्टरनेटबाट हुने अपराध न्यूनीकरणका लागि सेवाप्रदायकहरूले पनि प्रयास गरिरहेको र आगामी दिनमा यसलाई अझै परिस्कृत पार्ने प्रतिबद्धता जनाए ।

राष्ट्रिय बालअधिकार परिषद्का उपाध्यक्ष बमबहादुर बानियाँले बालबालिकामाथि हुने हिंसा रोक्न संघ, प्रदेश र स्थानीय तहमा संयन्त्र विकसित गर्न पहल भइरहेकाे जानकारी दिए ।

सिविनका अध्यक्ष माधव प्रधानले समन्वयात्मक रणनीतिका साथ काम गरे बालबालिकालाई अनलाइन याैन हिंसाबाट जोगाउन सकिने धारणा राखे ।