राक्सिराङमा राष्ट्रपति रनिङ शिल्ड प्रतियोगिता सुरु

मकवानपुर । मकवानपुरको बिकट राक्सिराङ गाउँपालिकामा पालिका स्तरीय राष्ट्रपति रनिङ शिल्ड प्रतियोगिता सुरु भएको छ । राक्सिराङ गाउँपालिका–३, पलाँसेस्थित सूर्योदय माध्यमिक विद्यालयको खेल मैदानमा सोमबारदेखि प्रतियोगिता सुरु भएको हो ।

राष्ट्रपति रनिङ सिल्ड खेलकुद प्रतियोगिता आयोजक समितिका संयोजक गाउँपालिकाका उपाध्यक्ष वनस्थम थिङको अध्यक्षतामा भएको प्रतियोगिताको गाउँपालिका अध्यक्ष राजकुमार मल्लले उद्घाटन गर्नुभयो । प्रतियोगिताको गर्दै अध्यक्ष मल्ले शारीरिक र मानसिक स्वास्थ्यका लागि खेलकुद अपरिहार्य भएको बताउनुभयो ।

साविक विजेता सूर्योदय माध्यमिक विद्यालयको आतिथ्यमा आयोजना भएको प्रतियोगितामा राक्सिराङ्ग गाउँपालिकाका ६ वटा माध्यमिक विद्यालय र ३ वटा आधारभूत विद्यालयका एक सय भन्दा बढी विद्यार्थीको सहभागी रहेको छ । प्रतियोगितामा एथ्लेटिक्स, भलिबल, कबड्डी लगायतका खेल समावेश गरिएको छ ।

पालिकास्तरीय प्रतियोगितामा छनोट भएका खेलाडीहरू जिल्लास्तरीय प्रतियोगितामा सहभागी हुनेछन् । राक्सिराङ्ग गाउँपालिकामा ५२ वटा सामुदायिक र २ वटा संस्थागत विद्यालयमा गरि ५ हजार भन्दा बढी विद्यार्थी विद्यालय तहमा अध्ययनरत छन् ।