मदन भण्डारी गोल्डकप इन्डो–नेपाल रनिङ शिल्ड पुरुष भलिबलको उपाधि त्रिभुवन आर्मीलाई

रुपन्देही । बुटवलमा आयोजित मदन भण्डारी गोल्डकप इन्डो–नेपाल रनिङ शिल्ड पुरुष भलिबल च्याम्पियनसिप–२०८१ को उपाधि त्रिभुवन आर्मी क्लबले जित्न सफल भएको छ। 

आर्मीले नेपाल पुलिस क्लबलाई ३–२ को सेटमा पराजित गर्दै उपाधि आफ्नो पक्षमा पार्यो।

खेलको क्रममा आर्मीले पुलिसलाई १८–२५, २५–१८, २०–२५, २५–२२ र १५–७ को स्कोरमा हराएको थियो। पहिलो सेट सजिलै जितेको पुलिसले आर्मीलाई दबाबमा राखे पनि दोस्रो सेटमा आर्मीले पुनरागमन गर्न सफल भयो। दुर्गा महतो, धनपति कुवर, र धनबहादुर भट्टको उत्कृष्ट प्रदर्शनले आर्मीले खेललाई बराबरीमा ल्यायो।

तेस्रो सेट पुलिसले आफ्नो पक्षमा पारेर खेललाई आफ्नो पक्षमा मोड्ने प्रयास गर्‍यो। तर, चौथो सेटमा आर्मीले उत्कृष्ट खेल प्रदर्शन गर्दै खेललाई निर्णायक सेटसम्म पुर्‍यायो। पाँचौँ सेटमा आर्मीले पुलिसका खेलाडीहरूका सर्टहरूलाई कुशलतापूर्वक ब्लक गर्दै सजिलै जित निकाल्यो।

प्रतियोगितामा मणिमुकुन्द भलिबल क्लब तेस्रो भयो। भारतको गुजरात भलिबल एसोसिएसनले नखेलेपछि मणिमुकुन्दलाई तेस्रो स्थान घोषित गरियो।

विजेता आर्मीले ट्रफीसहित ७ लाख नगद पुरस्कार प्राप्त गर्‍यो भने पुलिसले दोस्रो स्थानसहित ३ लाख ५० हजारमा चित्त बुझायो।