क्रिकेटर शेख दाजुभाइ वैवाहिक बन्धनमा बाँधिए

काठमाडौँ । नेपाली राष्ट्रिय क्रिकेट टोलीका विकेटकिपर ओपनर आसिफ शेख र उनका सहोदर दाजु  नेपाली राष्ट्रिय क्रिकेट टोलीका अलराउण्डर आरिफ शेख वैवाहिक बन्धनमा बाँधिएका छन् ।

वीरगन्ज महानगरपालिका वडा नम्बर १० निवासी २३ वर्षीय आसिफले आरजु खातुनसँग शुक्रवार र आसिफका दाजु २७ वर्षीय आरिफले सबाना खातुनसँगै बिहीबार मुस्लिम परम्पराअनुसार विवाह गर्नुभएको छ ।

आसिफ ३ वर्ष यता राष्ट्रिय क्रिकेट टोलीमा रहनु भएको छ । घरेलु क्रिकेटमा आसिफ विभागीय टोली नेपाल एपिएफ क्लबमा आबद्ध हुनुहुन्छ । हालै सम्पन्न नेपाल प्रिमियर लिग (एनपिएल)मा आसिफ जनकपुर बोल्ट्सका मार्की खेलाडी रहनु भएको थियो । फाइनलमा आसिफको कप्तानमा रहेको बोल्ट्सले सुदूरपश्चिम रोयल्सलाई पराजित गरेको थियो ।

यता आरिफ नेपालले खेलेको पहिलो ओडिआई टोलीका सदस्य रहनु भएको थियो । घरेलु क्रिकेटमा आरिफ विभागीय टोली नेपाल पुलिस क्लबमा आबद्ध हुनुहुन्छ । हालै सम्पन्न नेपाल प्रिमियर लिग (एनपिएल)मा आरिफ सुदूरपश्चिम रोयल्सबाट खेलेका थिए । फाइनलमा सुदूरपश्चिम जनकपुर बोल्ट्ससँग पराजित भएको थियो ।