मोटरसाइकल दुर्घटनामा परि एक जनाको मृत्यु, एक घाइते

बर्दिया । बर्दियामा मोटरसाइकल दुर्घटनामा परी एक महिलाको मृत्यु भएको छ । ठाकुरबाबा नगरपालिका १ डुम्रेनी गाउँमा मोटरसाइकल दुर्घटना हुँदा सोही गाउँकी ४६ वर्षिया मोतिसरा शाहीको मृत्यु भएको छ भने सोही गाउँका रुपानन्द न्यौपाने घाइते भएका छन् ।

गएराती सोही ठाउँ निवासी ४५ वर्षीय सुरत बहादुर शाहीले चलाएको भे ९ ५ २७८० नं मोटरसाइकल र सोही ठाउँ निवासी रुपानन्द न्यौपानेले चलाएको भे ३ प ६३६७ नं को मोटरसाइकल आपसमा ठोक्किएका थिए । शाहीले चलाएको मोटरसाइकलमा सवार मोतिसरा शाहीलाई उपचारको लागि नेपालगञ्ज लैजाने क्रममा बाटोमा ज्यान गएको प्रहरीले जनाएको छ ।

मोटरसाइकल चालक न्यौपानेको उपचार भइरहेको छ भने अर्का मोटरसाइकल चालक शाहीलाई प्रहरीले नियन्त्रणमा लिएको छ ।