सडक दुर्घटनामा परी एक युवाको मृत्यु

पोखरा । पोखरामा सडक दुर्घटनामा परी एक युवाको मृत्यु भएको छ ।

पोखरा महानगरपालिका वडा नम्बर ३१ स्थित लाँकुरी डाँडामा स्कुटर दुर्घटना हुँदा रुकुम पश्चिमको चौरजहारी गाउँपालिका वडा नम्बर १४ घर भएका २६ वर्षीय मौसम पुन मगरको मृत्यु भएको प्रहरीले जनाएको छ । 

बेगनास–भोर्लेटार सडकखण्डको भिरमा बा ७९ प ५८७७ नम्बरको स्कुटर सडकबाट तलको भिरमा खस्न पुग्दा मगरको घटनास्थलमै मृत्यु भएको इलाका प्रहरी कार्यालय शिशुवा डाँडा नाकाका प्रहरी निरीक्षक हरि बहादुर सलामीले बताउनुभयो । गत सोमबार बिहान करिब ८ः१५ बजे पोखरा ३१ मा रहेको आफ्नो डेराबाट स्कुटरमा निस्कनु भएको पुन एक्कासी भिरालोमा स्कुटरसँगै खस्न पुग्दा समयमै उपचार र गुहार नपाएर मृत्यु भएको स्थानीयले बताउनुभयो । 

दुई दिन देखि सम्पर्कविहीन अवश्थामा रहेका पुनको खाजी कार्य गर्दा सडक देखि करिब ४० मिटर झाडी सहितको भिरमा मृत अवस्थामा भेटिएको प्रहरीले जनाएको छ ।

मृतक पुनको शव हाल पोष्टमार्टमको लागि पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रिय अस्पताल) पोखराको शव गृहमा राखिएको छ । पुनको शव भिरमा अड्किएको अवस्थामा भेटिएको थियो ।