रातानाङ्ला गाडी दुर्घटना: मृतक सबैको सनाखत

सुर्खेत । सुर्खेत–दैलेख सीमास्थित वीरेन्द्रनगर नगरपालिका–१४ को रानिमत्तामा भएको फोर्स गाडी दुर्घटनामा परी मृत्यु भएका चार जनाको सनाखत भएको छ । 

जिल्ला प्रहरी कार्यालय सुर्खेतका अनुसार दैलेखको भैरवी गाउँपालिका–५ का गाडी चालक ३८ वर्षीय सुरेश केसी, वडा नं. २ का ३६ वर्षीय कर्णबहादुर विष्ट, वडा नं. १ की १६ वर्षीया दीपिका महतारा र २१ वर्षीया संगीता विष्टको मृत्यु भएको हो । 

आज दिउँसो साढे २ बजेको समयमा दैलेख बजारबाट सुर्खेततर्फ आउँदै गरेको कर्णाली प्रदेश ०२००१ ख ०९९८ नम्बरको फोर्स गाडी अनियन्त्रित भई दुर्घटना हुँदा चार जनाको मृत्यु हुनुका साथै ३० जना घाइते भएका थिए । 

३४ जना सवार उक्त गाडी सडकभन्दा झण्डै दुई सय मिटर तल खसेको जिल्ला प्रहरी कार्यालय सुर्खेतका सूचना अधिकारी (डीएसपी ) वीरेन्द्रवीर विश्वकर्माले जानकारी दिनुभयो । 

उहाँका अनुसार ३ जनाको अवस्था गम्भीर रहेको छ । 

घाइते सबैको प्रदेश अस्पताल कालागाउँ सुर्खेतमा उपचार भइरहेको छ ।