मकवानपुरको मनहरीमा बस दुर्घटना हुँदा ३५ जना घाइते

मकवानपुर। मकवानपुरको मनहरीमा बुधबार बिहान बस दुर्घटना हुँदा ३५ जना यात्रु घाइते भएका छन् । काठमाडौंबाट महोत्तरीको लागि छुटेको प्रदेश २-०३-००१ ख ३६२९ नम्बरको बस बुधबार बिहान मनहरी गाउँपालिका-७ समिडाँडा स्थित पूर्वपश्चिम लोकमार्गमा दुर्घटनामा परेको प्रहरीले जनाएको छ ।

मकवानपुर प्रहरी प्रवक्ता डिएसपी श्यामु अर्यालका अनुसार बस आफै अनियन्त्रित भई सडकबाट अन्दाजी १० मिटर तल खसेको छ । दुर्घटनामा परेर घाइते भएका ३५ मध्ये २८ जनाको चितवनस्थित  पुरानो मेडिकल कलेज भरतपुरमा उपचार भईरहेको उहाँले जानकारी दिनुभयो ।  जसमध्ये  १३ जनाको अवस्था मध्यम र १५ जनाको अवस्था सामान्य रहेको उहाँले बताउनुभयो । यसैगरी स्थानिय मनहरी अस्पतालमा ३ जना सामान्य अवस्थाका घाईतेको उपचार भइरहेको र हेटौँडा अस्पतालमा उपचाररत ४ जना घाईते उपचार पश्चात डिस्चार्ज भइसकेको उहाँले जानकारीअनुसार दिनुभयो ।

प्रवक्ता अर्यालका अनुसार बसका चालक महोत्तरीको पिपरा गाउँपालिका-२ का ३७ वर्षीय जय किशोर कापरलाई प्रहरीले नियन्त्रण रहेकोे जनाइएको छ ।