मोटरसाइकल एक आपसमा ठोकिँदा एकको मृत्यु दुई घाइते 

बर्दिया । बर्दियामा दुई मोटरसाइकल एक आपसमा ठोकिँदा एकको मृत्यु भएको छ भने दुई जना घाइते भएका छन् । मधुवन नगरपालिका वडा नं ३ खाता स्थित हुलाकी सडकमा विपरीत दिशाबाट आइरहेका मोटर साइकल आइतबार साँझ ठोकिएका थिए । 

मृत्यु हुनेमा गेरुवा गाउँपालिका वडा नं ५ बस्ने २४ वर्षीय विकास चौधरीको रहेका छन् । उनी राजापुरबाट ओराली तर्फ भे १२ प २१९० नं को मोटरसाइकलमा आइरहेका थिए । घाइते हुनेमा गेरुवा गाउँपालिका ४ गोला बस्ने ३७ वर्षीय जितेन्द्र चौधरी र ४६ वर्षीय सालिकराम चौधरी रहेका छन् । उनीहरू सानोश्रीबाट राजापुर तर्फ जाँदै गरेको सु.प्र.प. ०१–००९ प २१०४ नं को ८ मोटरसाइकलमा सवार रहेका थिए । 

दुर्घटना लगत्तै उनीहरूलाई उद्धार गरी बर्दिया अस्पताल पुर्‍याइएको थियो । उपचारको क्रममा विकासको मृत्यु भएको थियो । उनलाई नाक र मुखमा चोट लागेको थियो । घाइते भएका जितेन्द्रको बायाँ खुट्टा भाँच्चिएको छ भने चिउँडोमा चोट लागेको छ । त्यसैगरी सालिकरामलाई खुट्टा र शरीरको भित्री भागमा चोट लागेको प्रहरीले जनाएको छ । 

घाइतेहरूको नेपालगञ्जको वेष्टन हस्पिटलमा उपचार भइरहेको छ । मृतकको शव बर्दिया अस्पतालमा राखिएको जिल्ला प्रहरी कार्यालय बर्दियाका प्रहरी नायव उपरीक्षक ऋषिराम घर्तीमगरले बताउनु भयो ।