प्रधानाध्यापकसहित तीन जनाविरुद्ध भ्रष्टाचार मुद्दा दायर

सप्तरी । सप्तरीको कन्चनरुप नगरपालिकास्थित एक विद्यालयको शौचालयसहितका भौतिक संरचना निर्माणमा अनियमितता गरेको भन्दै तत्कालीन प्रअसहित तीन जनाविरुद्ध भ्रष्टाचार मुद्दा दायर भएको छ ।

जिल्लाको कन्चनरुप नपा–२ स्थित शङ्कर माध्यमिक विद्यालय बरमझियाका तत्कालीन प्रअ दिलीपकुमार गुप्ता, शिक्षक हृदयराम चौधरी र विद्यालयका कर्मचारी श्रवणकुमार चौधरीविरुद्ध अख्तियार दुरुपयोग अनुसन्धान आयोगले मङ्गलवार विशेष अदालतमा मुद्दा दायर गरेको हो ।

आयोगले प्रअ गुप्ताविरुद्ध आव २०७१/७२ मा विद्यालयको शौचालय निर्माणका लागि निकासा भएको बजेट हिनामिना गरेको, विद्यार्थीका नाममा आएको छात्रवृत्ति वितरण नगरी अनियमितता गरेको, आव २०७३/७४ मा राहत शिक्षकका लागि अनुदान बापत आएको रकम शिक्षक नराखी आफैँ बुझेको, पाठ्य पुस्तक खरिदमा हिनामिना गरेको लगायत विषयमा अनुसन्धान गरेको थियो । अनुसन्धानपछि मुद्दा दायर गरिएको अख्तियारले जनाएको छ ।

प्रअ गुप्ताविरुद्ध रु ६ लाख ४९ हजार ९ सय १६ बिगो कायम गरी बिगो बमोजिम जरिवाना र हिनामिना भएको बिगो बमोजिमको रकम निजबाट असुल उपर गर्नुपर्ने माग दाबी अख्तियारले गरेको छ ।

शिक्षक हृदयराम चौधरीविरुद्ध रु ६२ हजार ५ सय ८३ र कर्मचारी श्रवणकुमार चौधरीविरुद्ध रु ५ लाख ८७ हजार ३ सय ३३ बिगो कायम गरी मुद्दामा दायर गरिएको अख्तियारले जनाएको छ।

उनीहरूले शौचालय निर्माणमा रु ६२ हजार ५ सय ८३, छात्रवृत्ति रकममा रु ३ लाख १० हजार ४००, पाठ्यपुस्तक खरिदका लागि विनियोजित बजेटमा रु १ लाख २६ हजार २ सय ४७ र राहत शिक्षकको तलव भत्तामा रु १ लाख ५० हजार ६ सय ६८ हिनामिना गरेको पुष्टि भएपछि हिनामिना भएको रकमलाई बिगो कायम गरी भ्रष्टाचार मुद्दा दायर गरिएको अख्तियारले जनाएको छ ।