बाजुराको गौमुलमा पहिरोले ५ घर विस्थापित 

बाजुरा । बाजुराको गौमुल गाउँपालिका वडा नम्बर-२ रनेडामा पहिरोले ५ घर विस्थापित भएका छन् ।

मङ्गलवार राति देखि आएको अविरल वर्षाका कारण निरन्तर गएको पहिरोले रनेडाको  पुरै बस्ती नै जोखिममा परेको छ ।  

रनेडा बस्तीको  माथिबाट आएको पहिरोले ७ घर उच्च जोखिममा परेको र ५ घर विस्थापित भएको वडा नम्बर २ का वडा सदस्य प्रेम बहादुर रोकायाले बताउनुभयो । 

पहिरोका कारण  स्थानीय सालिभान रोकाया, मिहेन्द्रे रोकाया, साउने रोकाया, सगुने रोकाया र देबे सार्कीको घर परिवार विस्थापित भएको छ ।

विस्थापित ५ घरपरिवारलाई तत्काल वडाबाट त्रिपाल उपलब्ध गरी सुरक्षित स्थानमा सारिएको र अन्य उच्च जोखिममा परेका ७ घरपरिवार पनि सुरक्षित स्थानमा सर्ने क्रम जारी रहेको वडाअध्यक्ष देवबहादुर रोकायाले जानकारी दिनुभयो । 

पहिरो बाट विस्थापित परिवार र जोखिममा परेका बस्तीहरूको अवस्था बारे विवरण सङ्कलन गर्न प्रहरीको टोली गौमुल तर्फ गएको जिल्ला प्रहरी कार्यालय बाजुराले जनाएको छ।