‘प्रतिनिधिसभा र राष्ट्रियसभाको अधिकार र कर्तव्य समान हुनुपर्छ’
काठमाडौँ । राष्ट्रियसभाको आजको बैठकमा सांसदहरुले प्रतिनिधिसभा र राष्ट्रियसभाको अधिकार र कर्तव्य समान हुनुपर्ने बताउनुभएको छ ।
सांसदहरुले राष्ट्रियसभा निर्वाचित जनप्रतिनिधिले पनि निर्वाचित गरेको सभा भएकाले प्रतिनिधिसभा र राष्ट्रियसभालाई समान जिम्मेवारी दिनुपर्ने बताउनुभयो ।
त्यसअघि, सांसदहरुले विशेष समय माग गर्दै राष्ट्रियसभाका नव निर्वाचित अध्यक्ष नारायण दाहाललाई बधाई तथा शुभकामना दिँदै सभाको गरिमालाई थप उचाइमा पुर्याउने विश्वास व्यक्त गर्नुभयो ।
अध्यक्ष दाहालले आफूलाई प्रधानमन्त्रीको पारिवारिक नातासँग नजोड्न आग्रह गर्दै प्रधानमन्त्री दाहालसँग विचार केन्द्रित सहकर्मीको सम्बन्ध भएको बताउनुभयो ।
अध्यक्ष दाहालले राष्ट्रियसभाको भूमिकालाई थप माथि उठाउन आफु केन्द्रित हुने भन्नुहुँदै कानुन निर्माण र संसदीय प्रणाली, जनसरोकारका विषय, सङ्घीयता सबलीकरणमा सभालाई केन्द्रित गर्ने आफ्नो भूमिका हुने बताउनुभयो ।
सभाको बैठकमा अध्यक्ष दाहालले अध्यक्ष र उपाध्यक्ष अनुपस्थित हुँदा सांसद गंगा कुमारी वेल्वासे, जयन्ती राई, तुलसा दाहाल, पूजा चौधरी र विष्णु देवी पुडासैनीलाई अध्यक्षता गर्ने गरी मनोनयन गर्नुभयो ।
यसैगरी, बैठकमा अध्यक्षले विषयगत समितिमा रहने सदस्यहरूको नाम हेरफेर गर्नुभयो ।
बैठकमा राष्ट्रियसभाका विषयगत समितिमा रिक्त सभापतिको पदको यही चैत्र ४ गते निर्वाचन हुने जानकारी दिनुभयो ।
राष्ट्रियसभाको अर्को बैठक चैत्र २ गते शुक्रवार ११ बजेर १५ मिनेटमा बस्नेछ ।
प्रतिक्रिया राख्नुहोस्