सल्यानबाट ७० करोडको खसीबोका निकासी

सल्यान । गत आर्थिक वर्षमा सल्यानबाट ७० करोड भन्दा बढीको खसीबोका जिल्ला बाहिर निकासी भएको छ ।

गत आर्थिक वर्ष २०७९/०८० मा जिल्लाबाट ७० करोड भन्दा बढीको खसीबोका जिल्ला बाहिर निकासी भएको पशु अस्पताल तथा पशुसेवा कार्यालय सल्यानले जनाएको छ ।

कार्यालयका अनुसार ५७ करोडको खसी बोका निकासी भएको रेकर्ड भए पनि २ वटा स्थानीय तहको डाटा आई नपुगेकाले ७० करोडको खसी बोका निकासी भएको अनुमान गरिएको हो । गत आर्थिक वर्ष २०७८/०७९ मा जिल्लाबाट ५३ करोड भन्दा बढीको खसीबोका जिल्ला बाहिर निकासी भएकोमा यस वर्ष झन्डै १७ करोड बढी निकासी भएको पशु अस्पताल तथा पशुसेवा कार्यालय सल्यानका प्रमुख गोविन्द महतले बताउनुभयो ।

सल्यान बाख्रा पालनका लागि निकै सम्भावना भएको र उपयुक्त ठाउँ मानिन्छ । यहाँका किसानहरूको घर–घरमा बाख्रा पाल्ने गरेका छन् । जिल्लामा ४ लाख भन्दा बढी सङ्ख्यामा बाख्रापालन हुँदै आएको उहाँले बताउनुभयो । बाख्रा पालनलाई बढवा दिन प्रदेश सरकार र स्थानीय तहबाट एक पालिका एक पशु वस्तु कार्यक्रम मार्फत बाख्रा वितरण गरिएको महतले बताउनुभयो ।

जिल्लामा व्यावसायिक बाख्रापालन फस्टाउँदै गएका कारण पनि खसीबोका निकासी हुने क्रम बढिरहेको छ । प्रत्येक घरले सामान्य तह ३ देखि ५ ओटासम्म बाख्रा पालन गर्दै आइरहेको प्रमुख महतले बताउनुभयो ।

बाख्रापालन प्रवर्द्धनका लागि बाख्रा वितरण, उन्नत जातका बोका खरिद खोर निर्माण लगायतका कार्यक्रम सञ्चालन गरिएका पशु अस्पताल तथा पशुसेवा कार्यालयका सूचना अधिकारी वीरेन्द्र केसीले जानकारी दिनुभयो ।

सल्यानका खसी बोका काठमाडौँ, पोखरा, धनगढी लगायतका प्रमुख सहरमा बढी माग हुने गर्दछ । सल्यानका खसी बोका भनेपछि अन्य जिल्लाको तुलनामा व्यापारीहरूले बढी मूल्य हाल्ने गरेको पाइएको छ । जङ्गलमा घाँससँगै जडीबुटी पनि खाने भएकाले निरोगी, स्वस्थ र खानका लागि राम्रो हुने व्यापारीहरू बताउँछन् ।

जिल्लाका कपुरकोट, सल्ली बजार, कालीमाटी, रामपुर लगायतका नाकाबाट खसीबोका निकासी हुने गरेको सूचना अधिकारी केसीले बताउनुभयो ।