पहिलो पटक विद्युतीय गाडीहरूको मेला आयोजना हुने

काठमाडौँ । नेपालमा पहिलो पटक विद्युतीय गाडीहरूको मेला आयोजना हुने भएको छ । आगामी असोज ६ देखि ९ गतेसम्म हुने मेलाका लागि अनलाइन टिकट काट्न सकिने व्यवस्था गरिएको छ ।

काठमाडौँमा आयोजित पत्रकार सम्मेलनमा अटोमोबाइल्स डिलर्सं एसोसिएसन अफ नेपालका अध्यक्ष ध्रुव थापाले नाडा अटो शो गर्ने तयारी भइरहँदा सरकारले अटो आयातमा प्रतिबन्ध लगाए पनि विद्युतीय सवारी एक्स्पो गर्न लागिएको बताउनुभयो ।

नाडाका अनुसार असोज ५ गतेसम्म प्रि–बुकिङको व्यवस्था गरिएको छ । खल्ती एपबाट टिकट बुक गर्दा २० प्रतिशत सहुलियतमा पाइन्छ । नाडाका अनुसार विद्युतीय गाडीले १० प्रतिशत बजार हिस्सा ओगटिसकेको छ । अबको ५–६ वर्षमा ५० प्रतिशत बढी हिस्सा हुने बताइएको छ । नाडा ईभी मेलामा प्रवेशको लागि विद्यार्थीलाई १५० रुपैयाँ र सर्वसाधारणको लागि २ सय रुपैयाँ लाग्नेछ ।

नेपाल विद्युत् प्राधिकरण सहयोगी संस्थाको रुपमा सहभागी भएको भृकुटीमण्डप प्रदर्शनी स्थलमा आयोजना हुने उक्त एक्स्पोमा सेमिनार समेत आयोजना हुने नाडाले जनाएको छ । एक्स्पोको व्यवस्थापन ग्लोबल एक्सपोजिसन एण्ड म्यानेजमेन्ट सर्भिसेजले गरिरहेको छ ।

वर्तमान समयमा विद्युतीय सवारी साधनको महत्त्व दिनप्रतिदिन बढ्दै गएको र यस्ता सवारी साधनहरूको बढ्दो प्रयोगले आफ्नै मुलुकमा उत्पादित जलविद्युतको उपभोग बढ्न गई देशलाई आत्मनिर्भर बनाउन समेत सहयोग पुग्ने विश्वास आयोजकहरूको छ । मेलामा ठूला तथा साना गरी ५१ वटा स्टल र ब्लकहरू रहनेछन् ।