स्वर्गद्वारी–४ मा जीप दुर्घटना हुँदा एक जनाको मृत्यु, १४ घाइते

प्युठान । प्युठानको स्वर्गद्वारी नगरपालिका–४ भ्यागुतेमा जीप दुर्घटना हुँदा एक जनाको मृत्यु भएको छ भने १४ जना घाइते भएका छन् ।

स्वर्गद्वारी मन्दिर दर्शन गरेर भिङ्ग्रीतर्फ आउँदै गरेको जीप आज दिउँसो दुर्घटना हुँदा रुपन्देहीको मायादेवी गाउँपालिका –३ निवासी गुडिया ठाकुरको घटनास्थलमै मृत्यु भएको जिल्ला प्रहरी कार्यालय प्युठानका प्रमुख प्रहरी नायव उपरीक्षक सत्यनारायण थापाले जानकारी दिनुभयो ।

दुर्घटनामा परी घाइते १४ जनामध्ये ९ जनाको अवस्था गम्भीर रहेको प्रहरीले जनाएको छ ।

भिङ्ग्रीमा प्राथमिक उपचारपछि घाइतेहरूलाई बुटवल रिफर गरिएको प्रहरी नायव उपरीक्षक थापाले बताउनुभयो ।

जीपमा १७ जना सवार थिए । जीपको ब्रेक नलागेर दुर्घटनामा परेको प्रहरीले जनाएको छ ।