अपाङ्गता भएका व्यक्तिलाई पोखरा महानगरपालिकाले दियो गाडी 

कास्की । पोखरा महानगरपालिकाले अपाङ्गता भएका व्यक्तिहरूको आवागमन तथा यातायातमा पहुँच वृद्धि गर्ने उद्देश्यले स्वावलम्बन जीवनपद्धति केन्द्र (पोखरा) लाई गाडी हस्तान्तरण गरेको छ । 

महानगरपालिकाका प्रमुख धनराज आचार्य र उपप्रमुख मन्जुदेवी गुरुङले एक कार्यक्रमका बिच केन्द्रका अध्यक्ष हेम गुरुङलाई गाडी हस्तान्तरण गर्नुभएको हो ।

सो क्रममा प्रमुख आचार्यले विभिन्न कारणले शारीरिक, मानसिक तथा बौद्धिक अपाङ्गता भएका व्यक्तिहरूको जीवन सरल बनाउने कार्यमा यसले सघाउ पुग्ने विश्वास व्यक्त गर्नुभयो । स्थानीय सरकार हरेक नागरिकहरूको साथमा रहेको उल्लेख गर्दै प्रमुख आचार्यले गाडीको सदुपयोगतामा जोड दिनुभयो ।

स्वावलम्बन जीवनपद्धति केन्द्र (पोखरा ) का अध्यक्ष हेम गुरुङले अति र पूर्ण अपाङ्गता भएका व्यक्तिहरूका लागि सार्वजनिक यातायात पहुँचयुक्त नभएका बेला पोखरा महानगरपालिकाले उपलब्ध गराएको उक्त गाडिलाई पूर्ण सदुपयोग गर्ने बताउनुभयो ।

उहाँका अनुसार गाडीको पछाडिपट्टि लिफ्ट समेत जडान गरि अति र पूर्ण अपाङ्गता भएका व्यक्तिको पहुँच विस्तार गरिने छ । लिफ्ट जडानका लागि गाडी भारत पठाइने छ भने त्यसका लागत खर्च सम्बन्धित संस्थाले ब्यहोर्ने बताइएको छ ।

महानगरपालिकाले १८ सिट क्षमताको एउटा विङ्गर गाडी हस्तान्तरण गरेको हो ।