ताप्लेजुङमा पहिरोमा परी गम्भीर घाइते अधिकारको हेलिकोप्टरबाट उद्धार 

ताप्लेजुङ । ताप्लेजुङको सिरिजंघा गाउँपालिका वडा नं ७ खेवाङमा गएको पहिरोमा परि गम्भीर घाइतेलाई नेपाली सेनाको हेलिकोप्टरबाट उद्धार गरिएको छ । 

गए राति घरमाथिबाट आएको पहिरोमा परी गम्भीर घाइते विष्णु अधिकारीलाई हेलिकोप्टरबाट उद्धार गरी कोशी अञ्चल अस्पताल पठाइएको प्रमुख जिल्ला अधिकारी महेशकुमार बस्नेतले जानकारी दिनुभयो ।   

उहाँका अनुसार  नेपाली सेनाको यहाँ स्थित भीमकाली गुल्ममा ताप्लेजुङ अस्पतालका चिकित्सकले प्रारम्भिक उपचार गरी घाइते अधिकारीलाई थप उपचारका लागि विराटनगरतर्फ पठाइएको हो । 

घरमाथिबाट आएको पहिरोमा भाग्ने क्रममा अधिकारीको शरीरका विभिन्न भागमा चोटपटक रहेको छ ।  पहिरोमा परी घाइते अधिकारीको आमा तुलसा अधिकारी र श्रीमती यशोदा अधिकारीको मृत्यु भएको थियो । उहाँहरूलाई खेवाङबाट पोस्टमार्टमका लागि ताप्लेजुङ अस्पतालको शव गृहमा लगिएको जिल्ला प्रहरी कार्यालय ताप्लेजुङले जनाएको छ । 

पालिकाको वडामा मात्र ३० घरपरिवार पहिरोले विस्थापित बनेका वडाध्यक्ष बुद्ध दाहालले जानकारी दिनुभयो ।