स्थानीय तह निर्वाचनमा दोलखा : गठबन्धनको फाइदा माओवादी केन्द्रलाई

दोलखा । स्थानीय तह निर्वाचनको अन्तिम मत परिणाम आउँदा दोलखामा नेकपा एमाले दोस्रो दलमा खुम्चिएको छ । 

दुई नगरपालिकासहित नौ स्थानीय तह रहेको दोलखामा २०७४ को स्थानीय तह निर्वाचनमा दुई नगरपालिकासहित सात स्थानीय तह जितेर एमाले पहिलो दल बनेको थियो ।

यो पटक तीन पालिका प्रमुख, तीन उपप्रमुख र २५ वडा अध्यक्ष जितेर नेपाली कांग्रेस पहिलो दल बनेको छ भने दुई पालिका प्रमुख, पाँच उपप्रमुख र २४ वडा अध्यक्ष जितेर नेकपा एमाले दोस्रो दल बनेको हो । 

नेकपा माओवादी केन्द्रले तीन पालिका प्रमुख, एक उपप्रमुख र २१ वडा अध्यक्ष जितेर जिल्लामा तेस्रो दल बनेको छ । 

नेकपा एकिकृत समाजवादीले एक पालिका प्रमुख र दुई वडा अध्यक्ष जितेको छ भने दुई वडा अध्यक्ष स्वतन्त्र उम्मेदवारले जितेका छन् । 

नेकपा एमाले नेताहरूको व्यक्तिवादी चरित्र, गुटगत राजनीति र उम्मेदवार छनौटमा देखिएको विवादका कारण जिल्लामा दोस्रो दलमा खुम्चनुपरेको विश्लेषण कार्यकर्ताहरूले गर्न थालेका छन् । 

सत्ता गठबन्धनको कारण जिल्लामा सबैभन्दा बढी फाइदा नेकपा माओवादी केन्द्रलाई भएको छ । नेपाली कांग्रेस र नेकपा एकिकृत समाजवादीले भने सत्ता गठबन्धनबाटै असहयोग भएको गुनासो गरेका छन् । 
 प्राप्त अन्तिम मत परिणाम अनुसार जिल्लाको मेलुङ गाउँपालिकाको  अध्यक्षमा नेकपा एमालेको हिराकुमार थोकर विजयी हुनुभएको छ  । उहाँले एक हजार एक सय ५९ मतको फराकिलो अन्तरसहित नेकपा एकिकृत समाजवादीका रवीन्द्र कार्कीलाई  पराजित गर्नु भएको हो । थरकोको पाँच  हजार एक सय ५४ मत रहेको छ । 
उपाध्यक्षमा पनि नेकपा एमालेकै गायत्री आचार्य विजयी हुनुभएको छ ।  आचार्य पनि एक हजार चार सय ४७ मतको फराकिलो अन्तरसहित विजयी हुनुभएको छ  । आचार्यले चार हजार सात सय ४९ मत प्राप्त गर्नुभएको छ । 
त्यसैगरी, दोलखाको जिरी नगरपालिकाको  प्रमुखमा  नेकपा एमालेका मित्र जिरेल र उपप्रमुखमा  कृष्णमाया बुढाथोकी विजयी हुनुभएको छ । 

प्रमुख मित्र जिरेल दुई हजार नौ सय ४९ मतका साथ विजयी हुनुभएको हो । जिरेलका प्रतिस्पर्धी  नेपाली काँग्रेसका लाक्पा शेर्पाले दुई हजार छ सय ९२ मत प्राप्त गर्नुभएको थियो । 

यस्तै उपप्रमुखमा कृष्ण माया बुढाथोकी  तीन हजार चार सय ३४ मत  प्राप्त गरी विजयी हुनुभएको छ । उहाँको  निकटतम प्रतिद्वन्द्वी माओवादी केन्द्रका  तेजबहादुर तामाङ्गले तीन हजार एक सय २० मत प्राप्त गर्नु भएको थियो । 

 त्यसैगरी, दोलखाको तामाकोसी गाउँपालिकाको अध्यक्षमा नेकपा एकिकृत समाजवादीका प्रोण प्रताव केसी  र उपाध्यक्षमा नेपाली काँग्रेसको सृजना सुवेदी विजयी हुनुभएको छ । केसीले पाँच हजार चार सय  ९० मत प्राप्त गर्नुभएको थियो । 

उहाँको प्रतिद्वन्द्वी एमालेका अभिषेक सुवेदीले तीन हजार चार सय ६६ मत प्राप्त गर्नुभएको थियो । 

उपाध्यक्षमा काँग्रेसका सृजना सुवेदीले पाँच हजार चार सय ४२  मत प्राप्त गर्नु भएको छ भने उहाँको प्रतिद्वन्द्वी एमालेको अम्बिका पोखरेलले तीन हजार तीन सय ५१  मत प्राप्त गर्नुभएको छ । 

त्यसैगरी, बैतेश्वर गाउँपालिकाको अध्यक्ष र उपाध्यक्ष दुवै पदमा नेपाली कांग्रेस विजयी भएको छ । अध्यक्षमा  नेपाली काँग्रेसका छवि लामाले  पाँच हजार दुई सय ९९ मत प्राप्त गरी विजयी हुनुभएको छ । उहाँको प्रतिद्वन्द्वी एमालेका माधव प्रसाद घिमिरेले तीन हजार एक सय ७२ र  नेकपा माओवादी केन्द्रका लक्ष्मण खड्काले  दुई  हजार आठ  सय ७३  मत प्राप्त गर्नुभएको छ ।  

उपाध्यक्षमा नेपाली काँग्रेसकै कल्पना उप्रेतीले  पाँच हजार दुई सय ७३ मत प्राप्त गरी विजयी हुनुभएको छ । उहाँका प्रतिद्वन्द्वी एकिकृत समाजवादीका कल्याण दाहालले  दुई हजार सात सय आठ र एमालेको समर्थन रहेको स्वतन्त्र उम्मेदवार छवि लामाले दुई हजार ६७  मत प्राप्त प्राप्त गर्नु भएको थियो ।

त्यसैगरी दोलखाको गौरीशङ्कर गाउँपालिका अध्यक्षमा माओवादी केन्द्रका विश्वास कार्की विजयी हुनुभएको छ  । उहाँले चार हजार  सात सय ५१  मत प्राप्त भएको छ भने नेकपा एमालेका जङ्ग गुरुङले तीन  हजार सात सय ५७ मत प्राप्त गर्नुभएको छ । 

त्यसैगरी उपाध्यक्षमा नेपाली काँग्रेसको श्याम सुन्दर तामाङ विजयी हुनुभएको छ ।  तामाङले चार हजार  सात सय ४१ प्राप्त गर्नु भएको छ भने उहाँको प्रतिद्वन्द्वी एमालेका मुना शिवाकोटीले तीन हजार दुई सय ८१ मत प्राप्त गर्नुभएको छ । 

त्यसैगरी, शैलुङ गाउँपालिका अध्यक्षमा  नेकपा माओवादी केन्द्रका रिमालबाबु श्रेष्ठ निर्वाचित  हुनुभएको छ । उहाँले चार हजार नौ सय १८ मत प्राप्त गर्नु हुँदा नेकपा एमालेका उम्मेदवार धन बहादुर तामाङले चार हजार आठ सय ५८ मत प्राप्त गर्नुभएको छ  । 

पालिका उपाध्यक्षमा भने नेकपा एमालेकी पार्वती कार्की विजयी हुनुभएको छ । कार्कीले पाँच हजार एक सय ३५ मत प्राप्त गर्नुभएको छ भने  लामाले चार हजार सात सय ४१ मत प्राप्त गर्नुभएको छ । 

त्यसैगरी, जिल्लाको विगु गाउँपालिकामा गठबन्धनको तर्फबाट नेकपा माओवादी केन्द्रका उम्मेदवार सञ्जीव ओली चार हजार एक सय मतका साथ विजयी हुनुभएको छ  । उहाँको प्रतिद्वन्द्वी नेकपा एमालेका अच्युतम केसीले तीन हजार नौ सय ७३ मत प्राप्त गर्नुभएको थियो । 

ओली २०७४ को स्थानीय तहको निर्वाचनमा विगु गाउँपालिकामा उपाध्यक्षमा निर्वाचित हुनुभएको थियो । विगु गाउँपालिकामा उपाध्यक्षमा भने नेकपा एमालेको उम्मेदवार देवीका थामी निर्वाचित हुनुभएको छ । 

थामीले चार हजार १३ मत प्राप्त गर्नुहुँदा उहाँको प्रतिद्वन्द्वी गठबन्धनको उम्मेदवार नेपाली काँग्रेसका आङनिमा शेर्पाले तीन हजार आठ सय २६ मत प्राप्त गर्नुभएको थियो ।