नेपाली उत्पादनलाई विश्व बजारमा लैजान एडिबीसँग साझेदारी गर्नुपर्ने

काठमाडौँ ।अर्थमन्त्री जनार्दन शर्मा ‘प्रभाकर’ले नेपाली उत्पादनलाई विश्व बजारमा व्यापक रूपमा लैजान एसियाली विकास बैङ्क (एडिबी) सँग नेपालले थप साझेदारी गर्नुपर्ने बताउनुभयो । शुक्रवार एडिबीका कार्यकारी निर्देशक डा. वान फारिसनसँग भर्चुअल माध्यमबाट भएको छलफलमा उहाँले सो बताउनुभएको हो ।

नेपालमा उत्पादित सामान थोरै मात्रामा मात्र निर्यात भइरहेको जानकारी गराउनुहुँदै मन्त्री शर्माले यस क्षेत्रमा एडिबीसँग सहकार्य गर्नुपर्ने आवश्यकता रहेको बताउनुभयो । ‘नेपालको निकासी न्यून मात्रामा मात्रै भएको छ’, उहाँले भन्नुभयो, ‘उत्पादन गर्ने वस्तु वा क्षेत्रको छनोट र उत्पादित वस्तुको निकासी गरी विश्व बजार शृङ्खलामा पुर्‍याउन पनि एडिबीसँगको हाम्रो सहकार्य आवश्यक रहेको छ ।’ उहाँले अर्थतन्त्रको नकारात्मक पक्षहरूलाई न्यूनीकरण गर्ने कुराहरूमा पनि थप जोड दिन आवश्यक रहेको औँल्याउनुभयो ।

अर्थतन्त्र तथा व्यापारका सूचकाङ्कलाई सुधार गर्न जरुरी रहेको मन्त्री शर्माको भनाइ छ । त्यसका लागि लगानीमैत्री वातावरण निर्माण तथा निजी क्षेत्रलाई प्रोत्साहन एवम् उत्साहित बनाउनुपर्ने उहाँले बताउनुभयो ।

छलफलमा उहाँले एडिबीले कोभिड महामारीलाई नियन्त्रण गर्न तथा नेपालको अर्थतन्त्रलाई सुधार गर्न पुर्‍याएको सहयोगप्रति बैङ्कलाई धन्यवाद समेत प्रदान गर्नुभयो । उहाँले कोभिडपछि अर्थतन्त्रलाई उकास्न अझै धेरै काम गर्नुपर्ने बाँकी रहेको र त्यसमा थप सहकार्य नेपाललाई आवश्यक रहेको बताउनुभयो ।