मिडिया मैत्री नगर प्रमुखको रुपमा सरावगी सम्मानित

वीरगंज  । वीरगंज महानगरपालिकाका नगरप्रमुख विजय सरावगी मिडिया मैत्री नगर प्रमुखको रुपमा सम्मानित हुनुभएको छ । 

स्थानीय तहको सरकार प्रमुखको हैसियतमा सञ्चार माध्यमको विकास र प्रवर्द्धनका लागि बीरगंज महानगरपालिकाका प्रमुख विजय सरावगीले खेलेको भूमिका उदाहरणीय रहेको भन्दै नेपाल टेलिभिजनको वार्षिक उत्सवको अवसरमा आज नगर प्रमुखको कार्यकक्षमै आएर टेलिभिजनको  इटहरी च्यानलको टोलीले उहाँलाई सम्मान गरेको हो ।

सम्मानित भएसँगै  नगर प्रमुख सरावगीले आफूले निर्वाचन जितेर स्थानीय सरकार प्रमुखको हैसियतमा गर्नुपर्ने काम मध्ये सञ्चार माध्यमहरूको विकास र प्रवर्द्धन पनि प्रमुख प्राथमिकतामा राखेर काम गरेको बताउनुभयो । 

उहाँले स्थानीय सरकारले गरेको विकास र समृद्धिमा सञ्चार माध्यमहरूको पनि महत्त्वपूर्ण भूमिका रहने कुरामा समेत जोड दिनुभयो । 

उहाँले सञ्चारमाध्यमले आफूबाट भएका गल्ती कमजोरीहरूलाई औँल्याई दिएर गल्ती सच्याउन भूमिका खेल्न आग्रह समेत गर्नुभएको छ । 

उहाँले आफ्नो कार्यकालमा भएका विकासका काम र गरिएको गल्ती कमीकमजोरी औँल्याउने काम पनि सञ्चार माध्यमले नै गर्ने भएकोले त्रुटिहरू सच्याउने मौका सञ्चार माध्यहरूले नै दिएर आफूले नगरवासीहरूको हितमा काम गर्न प्रेरित गरेको बताउनुभयो । 

उहाँले सञ्चार माध्यमहरूले महानगर र आफूले गरेको सकारात्मक कामको प्रशंसा र गुणगान मात्रै गाउने नभई भएका गरेका गल्ती कमी कमजोरीहरू औँल्याएर सच्याउने काममा पनि निरन्तर सहयोगको अपेक्षा राखेको बताउनुभयो । 

नेपाल टेलिभिजन इटहरी च्यानलका प्रमुख पुष्पहरी क्याम्पा राईले आज महानगर प्रमुख सरावगीलाई उहाँकै कार्यकक्षमा सम्मान पत्रसहित सम्मान गर्नुभएको थियो । 

महानगर प्रमुख सरावगीलाई सम्मान गर्दै इटहरी च्यानलका प्रमुख राईले देशभरिका स्थानीय तहहरू मध्ये वीरगन्ज महानगरपालिकाले सञ्चार क्षेत्रको विकासका लागि नमुना काम गरेको र सञ्चारमैत्री नगर प्रमुखको रुपमा भूमिका निर्वाह गरेको बताउनुभयो ।