चिसोले जुम्लामा दुईको मृत्यु

 जुम्ला  । भारी हिमपातका कारण बढेको अत्यधिक चिसोले जुम्लामा दुई जनाको मृत्यु भएको छ । पाटनमा सेतो चिनी (खिरौला) कोर्न गएका तातोपानी गाउँपालिका तातोपानी ८ की ३७ वर्षीय महिला देवि शाही  र तातोपानी ७ बारगाउँका ४६ वर्षका मुन रावतको मृत्यु भएको जुम्लाका डिएसपी नरेन्द्र चन्दले बताउनुभयो । 

त्यस्तै खिरौला कोर्न गएका ५५ जना नागरिक बाक्लो हिउँ जमेका कारण पाटनमै रोकिएका छन् । भारी हिमपातकै बीच घर आउन खोज्दा अत्यधिक चिसोले दुई जनाको मृत्यु भएको र अनुमानित ५५ जना नागरिक पाटनमै रोकिएको खबर प्राप्त भएको तातोपानी गाउँपालिकाका प्रमुख प्रशासकीय अधिकृत मिलन बुढ्थापाले जानकारी दिनुभयो । 

यता सहायक प्रमुख जिल्ला अधिकारी प्रमिला रिजालले हिमपातमा फसेर पाटनमै रोकिएका ५५ जनाको उद्धारका लागि तयारी भइहरेको बताउनुभयो ।