प्रतिनिधिसभा बैठक : विरोधकै बीच ६ वटा अध्यादेश पेश
काठमाडौँ । प्रतिनिधिसभाको दशौं अधिवेशन आजदेखि सुरु भएको छ ।
संसद् भवन नयाँबानेश्वरमा आजदेखि सुरू अधिवेशनको पहिलो बैठकमा प्रमुख प्रतिपक्षी दल नेकपा एमालेका सांसदहरूको नाराबाजीका बीच ६ वटा अध्यादेश पेस भएका छन् ।
बैठक कानून, न्याय तथा संसदीय मामिला मन्त्री बडुले यौन हिंसाविरुद्धका केही ऐनलाई संशोधन गर्ने अध्यादेश, २०७८ र फौजदारी कसुर तथा फौजदारी कार्यविधिसम्बन्धी केही ऐन संशोधन गर्ने अध्यादेश पेश गर्नुभयो ।
यस्तै कानूनमन्त्री बडुले गृहमन्त्री बालकृष्ण खाँणका तर्फबाट नेपाल प्रहरी र प्रदेश प्रहरी (कार्य सञ्चालन, सुपरिवेक्षण र समन्वय) (पहिलो संशोधन) अध्यादेश २०७८, तेजाब तथा अन्य घातक रासायनिक पदार्थ (नियमन) अध्यादेश २०७८ र सामाजिक सुरक्षा (पहिलो संशोधन) अध्यादेश २०७८ पेश गर्नुभएको थियो ।
बैठकमा भौतिक पूर्वाधार तथा संसदीय मामिला मन्त्री श्री रेणुकुमारी यादवका तर्फबाट कानुनमन्त्री बडुले रेल वे सञ्चालन अध्यादेश पेश गर्नुभएको थियो ।
बैठकमा यसअघि सभामुख अग्निप्रसाद सापकोटाले राष्ट्रपतिबाट प्राप्त अधिवेशन आह्वान सम्बन्धी पत्रको ब्यहोरा पढेर सुनाउनु भएको थियो ।
प्रमुख प्रतिपक्षी दल नेकपा एमालेको अवरोधकै बीच सभामुख सापकोटाले संसद्को कारबाही अघि बढाउनुभएको थियो ।
नेकपा एमालेले आफूहरूले कारबाही गरेका १४ जना सांसद संसद् बैठकमा सहभागी भएसम्म विरोध जारी रहने भन्दै सदन अवरोध गर्दै आएको छ ।
अर्को बैठक आगामी पुस ६ गते मङ्गलवार दिउसो १ बजे बस्नेछ ।
प्रतिक्रिया राख्नुहोस्