गड्डाचौकी नाकामा चेकजाँचका लागि कुकुर परिचालन
कञ्चनपुर । चाडपर्वका लागि घर फर्किनेको चाप बढेसँगै गड्डाचौकी नाकामा चेकजाँचका लागि कुकुर परिचालन गरिएको छ ।
जिल्ला प्रहरी कार्यालय कञ्चनपुरले सुदूरपश्चिम प्रदेश प्रहरी कार्यालय धनगढीस्थित कुकुर शाखाबाट ‘लिलि’ नामको कुकुर परिचालन भएको हो ।
जिल्ला प्रहरी कार्यालय कञ्चनपुरका डिएसपी सिद्धराज न्यौपानेले दशैं तिहार सुरक्षा योजना अन्तरगत नाकामा कुकुर परिचालन गरिएको बताउनुभएको छ ।
“पटाका लगायत विस्फोटक पदार्थ र लागु औषधको ओसारपसार रोक्न कुकुर परिचालन गरिएको हो”, उहाँले भन्नुभयो, “नियमित चेकजाँच पनि चलिरहन्छ ।”
न्यौपानेका अनुसार लिलि दुई/तीन दिन नियमित रुपमा नाकामा रहन्छ । त्यसपछि पनि आकस्मिक रुपमा परिचालन गरिनेछ ।
जिल्ला प्रहरी कार्यालयले आजैदेखि दशँै तिहार सुरक्षा योजना समेत लागु गरेको छ । गस्ती र चेकजाँच बढाउनुका साथै सादा पोसाकका प्रहरी समेत परिचालन गरिएको डिएसपी न्यौपानेले बताउनुभएको छ
उहाँका अनुसार अहिले सामान्य अवस्थाभन्दा बढी जनशक्ति परिचालन गरिएको छ ।
प्रदेश प्रहरी कार्यालयबाट सुरक्षाकर्मी थप भएको छ । आजदेखि छठ पर्व सकिदासम्म दशैं तिहार सुरक्षा योजना लागु रहनेछ ।
प्रतिक्रिया राख्नुहोस्